Qarneya kurdkî ya Şaredarîyanê DEM Partîye: 62 Şaredarîyan ra 2yê înan kreş akerd

Partîya Têduştîye û Demokrasîyî ya Şaran (DEM Partî), partîyan ra yew a ke sîyaseta ziwanî ya tewr hîra pawena. Goreyê DEM Partî perwerdeyê ziwanê dayîke heqo bingeyên o û no heq meseleya hemwelatîya têduşt a. Waştişanê partîye yê tewr muhîman ra yew zî, sere de kurdkî, dayîşê perwerdeyî yê pêro ziwanan o ke binê tehlukeyê vîndîbîyayîşî de yê.

DEM Partî îdareyanê herêmîyan de zî zafziwanîye pawena. Tradîsyonê sîyasîyî yê DEM Partîye, polîtîkayê ke pawenê, 2009 ra dima yew bi yew ardî ca. Çarçeweya hedefê şaredarîya zafziwanî de, tabelayê bînayanê şaredarîyan rê kurdkî ameye zêdekerdene. Eşkerayîyî, afîş û îlanî tayê rey di, tayê rey zî demografîyaya şaristanan dîyaye çimî ver û 3-4 ziwanan de ameyî kerdene.

Proseso ke dewam keno de nê xebatî zî dewam kerdî:

Tîyatro, konser û çalakîyê edebîyatî

Kursê ziwanî û domanan rê kreş û atolyeyî

Çapkerdişê sanikan, kitaban û kovaran

Namekerdişê park, cade û merkezanê kulturî

Serra 2016î de bi tayînkerdişê qeyûman, nê prosesî de qutbîyayîş ame meydan. Qeyûman xeylêk cayan de tabelayê kurdkî hewadayî, buroyê ke bi kurdkî xizmet dayênê girewtî, kurs û kreşî betal kerdî, weşanê kurdkî qedexe kerdî.

Vaadê weçînayîşî

Weçînayîşanê herêmîyan ê serra 2024î ra dima nê warî de reyna têgeyîyayîşêk ame meydan. Beyannameya weçînayîşî ya partîye de zî derheqê nê babetî de xeylêk madeyî ca girewtî:

Kreşanê zafziwanî de do pêro roje xizmet bêro dayene.

Kreş, kurs û kitabxaneyî yê ke tede kitabê sanikan yê zafziwanî, kayê domanan û ferhengê bi resimî yenê şuxulnayene, do bêrê awankerdene; projeyê kulturî yê zafziwaninî do reyna bêrê pratîzekerdene.

Nuştiş, eşkerayîyî û daxuyanîyê çapemenîye yê şaredarîyan do bi hawayêkê zafziwanî dewam bikerê.

Mudurîyîya Pawitiş û Averberdişê Ziwanî do bêrê awankerdene; seba pawitiş û averberdişê kurdkî, suryanîkî, ermenîkî, erebkî û ziwananê herêmîyan ê bînan do xebatî bêrê kerdene.

Namekerdişê şaristan, taxan, dewan, kuçeyan û cadeyan bi hawayêkê zafziwanî do dewam bikero. Panoyî û tabelayê cayê gelemperî do zafziwanî bibê.

Awanîya mekananê kulturî yê zey Keyeyê Dengbêjan do dewam bikero.

Qarneya kurdkî ya 62 şaredarîyan

DEM Partî weçînayîşan de 3yê ci şaredarîyê şaristanê pîlî û 7ê ci wîlayetî pêro pîya 78 şaredarîyî qezenc kerdî. Hemşaredarê beldeyêk û 2 qezayan îstîfa kerdî, 3 hemşaredarî zî bi bahaneyanê cîyayan ameyî îxraçkerdene. 10 şaredarîyan rê zî qeyûm ame tayînkerdene.

Destê DEM Partîye de nika pêro pîya 62 şaredarîyî est ê. Ma prosesê 2 serran de xebatê zafziwanî û kurdkî yê nê şaredarîyan vistî binê çimî.

Ma şaredarîyan ra persa ke eşkerayîyê înan çend ziwanan de yê, domanan rê kreşê zafziwanî akerdî ya nê, xebatkarê şaredarîye kam ziwan de şarî dir têkilî ronenê û vaadê ke beyannameya weçînayîşî de est ê, înan ra kamî ardî ca. Şaredarîyê Îdir û Qers/Dîgor cewab nêda. Datayê ke şaredarîyanê bînan pare kerdî zî, mojna ra ke xeylêk vaadê weçînayîşî nêameyî cakerdene.

Sîteyê 46 şaredarîyan yewziwanî yê

Weçînayîşan ser o qasê 2 serrî derbas bîyî, la sîteyê înternetî yê xeylêk şaredarîyan hema zî yewziwanî yê. 46 şaredarîyî est ê ke sîteyê înan tenya Tirkî yê:

Semsûr/Pınarbaşı, Agirî/Bazîd, Amed/Pîran, Erzirom/Qereçoban, Erzirom/Tekman, Colemêrg/Gever, Îdir, Îdir/Xelfelî, Qers/Dîgor, Qers/Bazarcix, Mêrdîn/Şemrex, Mûş, Mûş/Milazgir, Mûş/Gimgim, Sêrt/Misirc, Şirnex/Gundikê Melê, Şirnex/Deştadarê, Riha/Serêkaniyê, Riha/Curnê Reş, Riha/Wêranşar, Wan/Elbak, Wan/Ebex, Wan/Artêmêt, Wan/Şax, Wan/Qelqelî, Agirî/Merkez, Bedlîs/Tetwan, Amed/Bismil, Amed/Erxenî, Amed/Hani, Amed/Sur, Amed/Kocaköy, Amed/Rezan, Elezîz/Dep, Mêrdîn/Artûklu, Mêrdîn/Kerboran, Mêrdîn/Dêrik, Mûş/Bulanık, Şirnex/Cizîr, Riha/Hewag, Riha/Pirsûs, Wan/Erdîş, Wan/Westan, Wan/Payîzava, Wan/Serav, Agirî/Giyadîn.

Sîteyê di şaredarîyan ê: Amed/Licê û Mêrdîn/Nisêbîn

Şaredarîyê ke sîteyê înan çîn ê: Bedlîs/Ovakışla, Erzirom/Qereyazî, Mûş/Altınova, Mûş/Elmakaya û Sêrt/Veyselkarani.

9 Şaredarîyî zafziwanî yê

Şaredarîyê ke sîteyê înan zafziwanî yê, zafêrî Amed û Wan de yê. Nê şaredarîyî wina yê:

Amed Şaredarîya Şaristanê Pîlî: Lehçeyê Kurdkî Kurmanckî û Kirmanckî/ Tirkî/ Îngilîzkî

Amed/ Peyas: Kurdkî/ Tirkî

Amed/ Pasûr: Kurdkî/ Tirkî/ Îngilîzkî/ Erebkî (Muhtewayê sîteyî zafêrî "qonaxa viraştişî de yo" hişyarî dano)

Amed/ Farqîn: Kurdkî/ Tirkî

Amed/ Yenîşehîr: Kurdkî/ Tirkî

Amed/ Xana Axpar: Kurdkî/ Tirkî (Kurdkî zaf aktîf nîyo)

Wan/ Rêya Armûşê: Kurdkî/ Tirkî

Wan/ Bêgirî: Kurdkî/ Tirkî

Wan/ Tûşba: Kurdkî/ Tirkî

Eşkerayîyî bi pêroyî zafziwanî yê

Performansê zafziwanîye yê şaredarîyan yê medyaya sanale (dîjîtale), goreyê sîteyê înternetî rindêr o. Xeylêk şaredarîyî parekerdişanê xo yê medyaya sanale bi pêroyî tirkî û kurdkî kenê. La tayê şaredarîyî zî est ê ke eşkerayîyanê xo bi yew ziwanî (Tirkî) kenê.

3 şaredarîyî tenya bi tirkî eşkerayîye/parekerdiş kenê.

5 şaredarîyî tayê eşkerayîyanê xo bi kurdkî kenê.

2 şaredarîyî 2 ziwanan ra zêdêr ziwanan de eşkerayîye danê.

Hesabê medyaya sanale yê tayê şaredarîyan (taybetî zî beldeyan) aktîf nîyê.

Şaredarîyê ke parekerdiş û eşkerayîyê înan yewziwanî yê: Agirî/Giyadîn, Amed/Licê û Erzirom/Qereyazî

Şaredarîyê ke zafêrî yewziwanî yê: Agirî/Merkez, Elezîz/Dep, Şirnex/Cizîr, Riha/Hewag, Mêrdîn/Nisêbîn

Şaredarîyê ke 2 ziwanan ra zêdêr ziwanan de eşkerayîye danê nê yê: Mêrdîn/Artûklu (Tirkî, Erebkî, Kurdkî û Suryanîkî), Amed Şaredarîya Şaristanê Pîlî (Tirkî, Kurdkî û Îngilîzkî)

Tenya 2 şaredarîyan gamî Eeştî: 4 kreşî ameyî akerdene

Hedefê DEM Partî yê tewr pîlî yê derheqê kurdkî ra yew, her şaristan de akerdişê kreşanê zafziwanî bi. No hedef beyannameyê peyêna weçînayîşî de zî ca girewt.

La tablo, demanê verînan ra zî peyser kewt. No war de tenya 2 şaredarîyan gamî eştî.

Amed Şaredarîya Şaristanê Pîlî: Baxçeyê Domanan (Kreşê) Zarokistan 450 Evler û Zarokistan Bagcılar akerdî.

Şaredarîya Peyasî: Zarokistan Xalxalok û Zarokistan Perperik akerdî.

Çime: Ajansê Mezopotamyayî