Qetlîamê Sêwazî û vengê ma yo ke nêbirîyeno
Qetlîamê Sêwazî (Madimak) yê 2 Temmuza 1993yî, tenya seba şarê elewîyî nê, seba mûxalefetê komelkîyê kurdan û edebîyatê înan zî yew roja zaf tarî ya. 33 roşnvîr, nuştox, şaîr û hunermendê ke Otelê Madimakî de ameyî vêşnayîş, mîyanê înan de Hasret Gultekîn, Nesîmî Çîmen, Asim Bezîrci û Metîn Altiok zî estbîyê. Nê nameyî temsîlkarê nasnameyê kurd-elewî û qehremanê edebîyat û muzîkê çepgir-sosyalîstî bîyê.
Roje, 2 Temmuza serra 1993yî bîye. Sêwaz de, Otelê Madimakî de şaîrî, nuştoxî, hunermendî û roşnvîrî seba Şenlikanê Pir Sultan Abdalî ameybî têhet. La a roje, tarîxê Tirkîya de bîye yew lekeya sîyaye. Yew grûbêka faşîst û dînperest, dormareyê otelî girewt û dima zî otel da veşnayîş. 33 canî, 33 roşnvîrî mîyanê adirî de, binê çimanê dewlete de ameyî qetilkerdiş. No qetlîam, tarîxê şarê ma de yew birîna xorîn a ke hema zî weş nêbîya û qet weş nêbena.
Mîyanê nê 33 canan de kesayetê zaf muhîmî estbîyê; sey Hasret Gultekîn, Nesîmî Çîmen, Asim Bezîrcî û Metîn Altiok. Nê nameyî tenya merdimî nêbîyê; ê xezîneyê kultur, ziwan û hunerê ma bîyê. Hasret Gultekîn bi tembûrê xo û vengê xo yê kirmanckî, Nesîmî Çimen bi cûrayê xo û kulturê aşiqan, Asim Bezîrcî bi cigêrayîş û rexneyanê xo yê erjayeyan, û Metîn Altiok zî bi şîîranê xo yê bêhempayan zerrîya şarî de ca girewtbî. Ê pêro nasnameyê kurd û elewîyan, wayîrîya qedr û qîymetê çepgir û sosyalîstan kerdêne. Merdîşê înan, edebîyat û muzîkê mûxalîfan rê, xususen edebîyatê kurdan û elewîyan rê yew derbêka zaf pîl bîye.
Pergalê serdestî waştêne ke bi nê qetlîamî vengê muxalefetî, vengê çepgiran, vengê kurd û elewîyan bibirno. Waştêne ke roşnvîrîye û kulturê xoverdayîşî mîyan ra wedaro. La hesabê înan raşt nêvejîya. Çimkî eserê nê 33 canan zaf xorîn û quwetin bîyê. Madimak de tenya roşnvîrî nê, wîjdanê merdimîye zî veş a. La dima ra, adirê Madimakî zerrîya şarî de bî yew adirê têkoşînî. Heta nika, xort û keyneyê ma bi şîîranê Metîn Altiokî pîl benê, bi tembûrê Hasret Gultekînî deyîran vanê. Asım Bezîrcî bi nuşteyanê xo yê zanistan û marksîstan, rayîrê roşnvîrîye hema zî mojna ma.
Şarê ma, her serra 2 Temmuze de nê qetlîamî bi nefret şermezar keno û şehîdanê xo bi hurmet anê vîrî. Edalet 30 serrî ra zêdêr o ke hema zî ca nêbîyo, qatilî ameyî pawitiş û muhakemekerdîşê înan bi kayanê sîyasetî ame xerepnayîş. La têkoşînê heq û heqîqetî, edebîyat û hunerê nê qehremanan reyde dewam keno.
Qetlîamê Sêwazî, bîr û vîrê mûxalefetê komelkîyê kurdan û şarê elewîyî de yew adir o ke qet nêhêwrîyeno. Ma do qet nê qetlîamî vîrî ra nêkerê û nêdê vîrîkerdiş. Vengê Hasretî, şîîra Metînî, vatişê Asimî û deyîra Nesîmîyî do hertim rayîrê ma roşn bikero û têkoşînê ma pîlêr bikero. Şehîdê Madimakî bêmerg ê!
