KCK: Ne Rayber Apo ne zî Têgêrayîşê ma yê Azadîye ferzkerdiş qebul keno

Eşkerayîya Hemserekîyîya Konseya Rayberî ya KCK’yî averşîyayîşê ravêrdeyî ser o aşkereya nuştekî pare kerd.

Aşkerayîya KCK’î bi nê hawayî ya:

"Xeylê wext o mîyanê raya pêroyîye û çapemenîya Tirkîya de nîqaşê qanunê çarçewa yeno kerdene. Çapemenîye de ercnayîşê winasî yenê ziwan ke nê ercnayîşî bi projeyê aştîye û komela demokratîke yê Rayber Apoyî nêkewnê tê, heto bîn ra zî vera ci yê. Teyna peyên, pêşnîyazê ke Rayber Apoyî 24ê Gulane de Îmrali de pêşkêş kerdî û pêvînayîşê ke heyetê DEM Partîye bi rayedaranê AKP’yî reyde kerdî, sey ke newe yê ameyî nîşandayene. 24ê Gulane ra nata tu pêvînayîş bi Rayber Apoyî reyde nêameyo kerdene. Dima ra pêvînayîşê 24ê Gulane, pêşnîyazê ke Rayber Apoyî pêşkêş kerdî, do hetê hukmatî ra biameyêne ercnayene. Nê ercnayîşî do Rayber Apoyî rê biameyêne vatene û netîceyê ci zî do Têgêrayîşê ma rê biameyêne vatene. La heta nika na prosedure nêmeşîyaya. Coka a roje ra nata tu têkilîye yan zî hedîseyêko ke hêjayê ercnayîşî yo nêqewimîyayo. Babêtêka winasîya tarîxîye û girînge de tecrîdê serê Rayber Apoyî dewam keno û Têgêrayîşê ma yê Azadîye zî mîyanê nê wextî de tu agahîye nêgirewta.

Têgêrayîşê ma yê Azadîye her tim ravêrdeyê Rayber Apoyî reyde zerrîdar bi û her tewir hewldayîşê hewceyî ardî ca. Seba çareserîya sîyasîya demokratîke ya persan, ma bi xeylê zaf hetan hewl da û gamê girîngî zî eştî. Seba ke qanunê azadîye yê ke sîyasetê demokratîkî bi hawayêko azad tede bêra kerdene bêrê vetene, ma paştî daye hewldayîşanê ke na babête de ameyî kerdene. Na çarçewa de ma kêm û bi kêmasîye zî bibo, reyna zî raporê komîsyonê demokrasî, aştîye û way-birayîye erênî dî.

Prosesê aştîye û komela demokratîke rasterast ma eleqedar keno. Seba ke bandorêka neyênîye ravêrdeyî û dîyaloganê bi Rayber Apoyî ser o nêbo, sey Têgêrayîşî ma rast nêdî ke her tim eşkerayîyan bidê. La polîtîka, eşkerayîyî û ercnayîşê dema peyêne ke yenê kerdene, îhtîyacîya na yewe aferne ke ma bi eşkerayîyêk vînayîşanê xo raya pêroyîye reyde pare bikerê.

Eke Serekeyîye reyde pêvînayîş û nîqaş nêro kerdene, vînayîşê têgêrayîşê ma nêro girewtene û serê na yewe ra bêro vatiş ke do qanunêk bi filan hawayî bêro vetene, zereyê ci de do filan filan çîyî bibê; na yewe do sey kayêk, sey ferzkerdişêk, heto bîn ra zî sey komployêk bêra dîyene. Xora Numan Kurtulmuşî bi eşkerayîyêk vat, do qanunêk bêro vetene, yê ke yenê do bêrê, yê ke nêameyî do vera înan de çîyo ke hewce keno bêro kerdene. Qerarêko ke eleqedarê na rêxistine yo bi hawayêko hempar yeno girewtene û bi hemparî zî yeno caardene. Têgêrayîşê ma yê azadîye teyna qanun û gamê hemparî û yewpareyî cîdî vîneno û gêno çiman ver. Neke nêzdbîyayîşo winasî; qismêk do bêro qismêk do nêro, nêbeno. Problem teyna çekverdayîşê şervanan nîyo. Bêguman helwesto ke vera şervan û rayberanê nê têgêrayîşî de yo zî yew o. Nîşandayîşê nêzdbîyayîşêko cîya do bibo sabotekerdene nê prosesî.

Sey Têgêrayîşê Azadîye kongreya fesixkerdişê PKK’yî de ma qerar da ke prosesê fesixkerdişî û bêçekbîyayîşî do hetê Rayber Apoyî ra bêro rayberdiş. Rayber Apo zî teyna mîyanê şert û mercanê xebitîyayîşê azadî de eşkeno nê ravêrdeyî bimeşno. Şarê ma û têgêrayîşê ma hîna destpêk ra destnîşan kerd ke polîtîka û pratîkêko bêyî azadîya Rayber Apoyî, bêyî aferîyayîşê mercanê xebitîyayîşê azadî, qebul nêkeno. Heta ke statuyê Rayber Apoyî de nêzdbîyayîşêko erênî nêro nîşandayene û na çarçewa de gamêk nêra eştene, kes nêeşkeno qeraranê ke kongreya PKK’yî de ameyê girewtene biyaro ca.

Dîyalogo ke Serekîyîye reyde û têkilîya ke ma reyde ya, seba a yewe ya ke helwest û polîtîkayêka hempare bêra afernayene. Neke vatîşê 'ma do qanunêk bivejê, yê ke yenê do bêrê, yê ke nêyenê nêyenê' nêbeno. Gelo nê ravêrdeyî de waştiş û cigêrayîşê çareserîyêk esto, yan zî yeno waştene ke sereyê komelî têw bişîyo; yan zî vera Têgêrayîşê Azadîye şerêko taybet yeno meşnayene? Eke qanunêko ke maneno qanunê agêrayîşê banî bêro vetene û nêzdbîyayîşê çareserîya demokratîke yê yewpareyî nêro nîşandayene, ne şarê ma, ne zî komelê ma yê rêxistine do naye qebul bikera. Coka eke yeno waştene ke persê se serrî, persê qutbîyayîş û şerî yê pancas serrî bêrê çareserkerdene, ganî nêzdbîyayîş û ferasetêko rast bêro nîşandayene.

Halo hazir de hema vajê amadekarîye seba şerêko newe yena kerdene, polîtîkayêka winasîye yena meşnayene. Musteşarê MÎT’î Îbrahîm Kalin teyna sey serekê rêxistinêka îstîxbaratî nê, eynî wext de sey serekwezîrê hukmatêk Iraq de gêreno. Verê cû hêrîşanê serê Rojawanî de pêvînayîşê winasîyî ameybî kerdene. Çi karê musteşarê MÎT’î Bexda, Silêmanîye û Hewlêr de esto, çi keno? Gelo planê tasfîye û hêrîşê serê têgêrayîşê ma yê azadîye de yeno waştene ke tayê rolî nê hêzan rê bêrê dayene? Bêguman ganî heme şarê kurdî û hêzê sîyasîyî hayîdarê polîtîkayanê winasîyan bibê. Ganî vatîşê Tirkîya bi yewhetî û vînayîşê ke nêgêrenê menfeatê kurdan bêrê dîyene. Gelo Tirkîya herinda çareserkerdişê persê xo yê zereyî, dima ra qerarê hukmatê Iraqî yê serê hêzanê çekdaran yê teberê artêşe reyde, bi Iraqî reyde planê hêrîşêk serê Têgêrayîşê ma yê Azadîye kena? Yeno zanayene ke Îranî reyde zî pêvînayîşê winasîyî ameyî kerdene. Eke planê winasîyî yê Dewleta Tirk estbê, ma o bawerî de yê ke ganî Iraq înan qebul nêkero.

Ma wazenê na yewe eşkera nîşan bidê; Ne Rayber Apo ne zî Têgêrayîşê ma yê Azadîye ferzkerdişêk qebul keno. Bi vatîşê 'Ma qanun vet, qebul nêkenê' ercnayîş û ferzkerdişê polîtîkaya şerê taybetî, do bibo nêzdbîyayîşêko dûrîyê aqilî. Do bibo dewamkerdişê înan polîtîkayan ke se serrî yo netîce reyde nêarda û şarê kurdî û Tirkîya yewbînan ra qut keno. Coka nêzdbîyayîşê Rayber Apoyî û nêzdbîyayîşê Têgêrayîşê ma yê Azadîye de ganî cîdî û bi berpirsîyarîyê bo.

Sey Têgêrayîşê Azadîye ma wayîrê a îrade û qerardarîye yê ke atmosferê şer û qutbîyayîşî yê pancas serran werte ra wedaro, serê bingehê çareserîya sîyasîya demokratîke de entegrasyono demokratîk Tirkîya reyde pêk biyaro û nêzdbîyayîşêko winasî yê sîyasîyî biko pratîk. Seba dewleta Tirkîya zî berpirsîyarîyêka tarîxî ya ke seba pêkameyîşê na îrade û qerardarîya ma, seba caardişê entegrasyonê demokratîkî bi polîtîka û gamanê xo wezîfe û berpirsîyarîya xo biyaro ca.

Ganî raya pêroyîya demokratîke û şarê ma vera nêzdbîyayîşanê ke prosesê aştîye û komela demokratîke sabote kenê hîşyar bibê, vera tecrîdê Îmraliyî de têkoşînêko bi bandor bimeşnê û seba serkewtişê prosesê aştîye û komela demokratîke wezîfe û berpirsîyarîya xo biyarê ca."