Serrgêra 33ine de Qirkerdişê Madimakî bi meşî dest pêkerd

Serrgêra 33ine ya Qirkerdişê Madimakî de bi hezaran kesî, bi slogananê “Sêwas vîra nêşo, vîrî ra nêde” rayîrşîyayîş dest pêkerd. Sêwas de 2ê Temmuze de Festîvala Pîr Sultan Abdalî rê, 33 roşnvîr û hunermendê ke tewrê şayîye bîyî, Otelê Madimakî de ameyî vêşnayene û qetilkerdene. Serrgêra 33ine ya nê qirkerdişî de yadkerdiş yeno viraştene.

Yadkerdiş de xaricanê keyeyanê qurbanan ra pîya, temsîlkarê dezgehanê elewîyan, Hemsereka Pêroyî ya Partîya Têduştîye û Demokrasîyî ya Şaran (DEM Partî) Tulay Hatimogulları, Hemsereka Pêroyî ya Partîya Herêmanê Demokratîkan (DBP) Çigdem Kılıçgun Uçar, Serekê Pêroyî yo weçînîyaye yê CHP Ozgur Ozel, xeylê temsîlkarê partîyanê sîyasîyan û temsîlkarê dezgehanê komelê sîvîlî ca girewtî.

Kesê ke tewrê yadkerdişî bîyî, verê Komeleya Kulturî ya Pîr Sultan Abdalî de ameyî têhet. Tîya ra bi kortejan ver bi Otelê Madimakî yê verênî rayîr şîyî. Verê girseyî de kesê ke tîşortê bi fotografanê 33 roşnvîranê qetilkerdeyan dayî xo ra, ca girewtî.

Dewamê rayîrşîyayîşî de fotografê kesê ke weşîya xo vîndî kerde ameyî kiriştene û pankartê sey "Ronişnê Sêwasî nêtefîyeno" û "33 Serrî Vîyartî Ma Vîra Nêkerd, Ma do Vîrî ra Nêdê" ameyî akerdene. Girseyî bi slogananê "Xelisîyayîş çin o tena, ya pêro pîya ya zî qet yewê ma", "Sêwas vîra nêşo, vîrî ra nêde" û "Kiştoxî do şarî rê hesab bidê" meşê xo domna.

Meş de deyîr û kilamanê hunermendanê ke qirkerdiş de weşîya xo vîndî kerde, ameyî cinitene û vatene.