Raporê Jeolojîye: Bi JES'î herre do biba beton!
Raporê pîsporan ê derheqê projeyê Santralê Enerjîya Jeotermalî (JES) yê Kanîreş û Gimgimî de bale ante rîskanê ciddîyan ser. Muhendîsan hîşyarî daye ke proje do hem awa binê erdî leymin bikero hem zî rîskê hezazan zêde bikero; nê rîskan ra şar do mecbur bimano ke herêma xo ra bar bikero
Vera projeyê Santralê Enerjîya Jeotermalî (JES) ke yeno waştene Kanîreş û Gimgim de bêro viraştene, nêrazîbîyayîşî dewam kenê. Vera xebata sondajî ya şîrketê IGNIS H2’yî ke herême de sey xebata sondajî ya verêne do bêra kerdene, Gimgim de 20 rojî yo nobeta xeyme yena kerdene. Kanîreş de zî şar bi ronayîşê platformî vera projeyî xo rêxistin keno.
Daweya ke vera projeyî ameya akerdene de ame waştene ke wa ruhsat û qerarê ÇED'î yê ‘pozîtîfî bêrê betalkerdene. Raporê pîsporan de zî yeno vatene ke projeyê JES'î eşkeno awa binê erdî leymin bikero û rîskê hezazan û hereketanê sîsmîkan zêde bikero.
Raporo ke hetê Muhendîsê Berzî yê Jeolojî Eşref Atabeyî ra ameyo hazirkerdene de ame vatene ke herême de zehmet o ke çimeyê jeotermalî yê bi entalpîyê berzî bêrê vînayene; nê eşteyî do zirar bidê dormeyî û waranê citkarîye. Rapor de reyna ame hîşyarkerdene ke rîyê metalanê giranan, gazanê jehrinan û texrîbatê dormeyî ra şar do mecbur bimano ke bar bikero.
