Şarê Amedî: Ganî game bêra eştene, Rayber Apo azad bibo

Vengdayîşê ''Komelê Demokratîkî'' yê 27ê sibate yê Rayber Apoyî ra serrêk vîyart zî, dewlete tu gamêka şênbere nêeşte. Raya pêroyî de seba averşîyayîşê prosesî waştişê ''hewanayîşê tecrîdê Îmrali'', ''caardişê heqê hêvîye'' û azadîya fîzîkî ya Rayber Apoyî vejîyenê vernî. Şarê Amedî ke derheqê rewşa nikayîne ya prosesî de ANFyî rê qisey kerd, vat ke seba çareserîyêka menda ganî dewlete game bierzo.

''Ma pawenê ke dewlete game bierzo''

Fatma Adak vat ke kurdan çîyo ke ganî bikerê, kerdo la dewlete hema tu gamêka şênbere nêeşta. Fatma Adak wina vat: ''Prosesêko ke ame destpêkerdene est o la gamê raştî nêerzîyenê. PKKyî xo fesh kerd, her tewir game ke ganî bierzîyo eşt la dewlete hema tu game nêeşta. Ma nika nê gaman pawenê. Sebebê pêserbîyayîşê ma û çalakîya rayîrşîyayîşî no yo. Eke Rayber Apo prosesî teber ra aver bero do netîceyê hîna bihêzî vejîyê. Ma na hişmendîye de yê û naye wazenê. Ma haştîye wazenê. Hepisxaneyan de tepîşteyê ma est ê; merdimê ke 30 serran o hepisxane de yê est ê û veradayîşê înan ê hêdî-hêdî çareserî nîya. Nê xora heqê înan o tewr bingeyin o. Ma pawenê ke gamê hîna mende û cidî bêrê eştene.''

''Haştîye vernîya Tirkîya akena''

Mehmet Bayikî vat ke proses hetê dewlete ra ame xetimnayene û Rayber Apo bi tena serê xo cehd keno ke proses aver şêro. Bayikî bale ante ser o û vat: ''Ez bawer nêkena ke dewlete nê prosesî de raşta haştîye wazena. Eslê xo de awankerdişê haştîyêka pîle vernîya Tirkîya de seba herkesî tercîho tewr baş o. Bi taybetî hetê ekonomî ra Tirkîya rewşêka zaf çetine de ya. Eke haştîye temîn bibo Tirkîya her hetî ra xurt bena. Pîyabîyayîşê kurd û tirkan hetê herême ra do netîceyanê muhîman peyda biko. Ewro Rayberîye derheqê estbîyayîş û ameyoxê şarê kurdan de berpirsîyarîyêka pîle girewta xo ser. Coka ma Rayberîye ra bawer kenê. Ma vatişanê ey esas gênê û bawerîya ma a ya ke do haştîyêka birûmete awan bikero.''

''Proses xetimîya, şar pawayê gamanê şênberan o''

Şevîne Tunay zî ard vîrardene ke badê 27ê sibate, mîyanê Meclîsî de komîsyonêk awan bî û pêvînayîşî gelek dezgehan reyde ameyî kerdene. La Şevîne Tunay dîyar kerd ke mîyanê demê vîyarteyî de averşîyayîşê şênberî nêbîyî û vat:

''Raporê komîsyonî qedîya la proses hêdî-hêdî dest bi xetimîyayîşî kerd. Ma zî seba naye ewro çalakîya rayîrşîyayîşî kerd. Pawitişê ma yo bingeyin haştî ya. Êdî ma nêwazenê ke bajaranê ma de merdimî bimirê. Ma wazenê ke şarî bingeyê hemwelatîya seypêye de pîya biciwîyê. Ma wazenê ke demokrasî, wayûbirayîye û yewîye nê erdan de serdest bê.

Temînkerdişê azadîya fîzîkî ya Birêz Abdullah Ocalanî, prosesî rê samîmîyet dano. Eke gamê hewceyî bêrê eştene, şarê kurdan zî do bivîno ke prosesêko raştîkên o demokratîk yeno averberdene.''