Semedê Zazakî do Amed ra mektuban bierşawê UNESCO û Serekkomarîye

Meclîsê Kirmanckî-Zazakî yê MED-DER'î, bi wesîleyê "21ê Sibate Roja Ziwanê Dayîke ya Dinya", eleqe anceno tehlukeyê vîndîbîyayîşê Kirmanckî (Zazakî) ser.

Beyanatê Meclîsî “Seba Pawitişê Kirmanckî-Zazakî vengê xo berz bikerê! Ma do roja 20.02.2026î, Amed de, saete 12:30 de, verê Postexaneyê Sûrî de seba pawitişê Kirmanckî UNESCO, Serekkomarîye û MEBî rê mektuban bierşawe. Bêrê ma pîya seba pawitişê ziwanê xo vengê xo berz bikerê!” ame vatiş.

Meclîs aşkere kerd ke ê do bi şiarê "Ez nêwazena ziwanê mi vîndî bibo" mektuban bierşawê dezgehanê mîyanneteweyî û resmîyan

Beyanatê Meclîsî de wîna ame vatiş:

"Seke ke şima zî zanenê ‘21ê Sibate’; ‘Roja Ziwanê Dayîke ya Dinya’ ya. Ma zî sey Meclîsê Kirmanckî-Zazakî na roje de, semedê zaravayê ma yê Kirmanckî/Zazakî/Kirdkî/Dimilkî ke vîndî beno û tehlukeyê vîndîbîyayîşî reyde rî bi rî yo, çalakî û aktîvîteyan organîze kenê.

Na çarçewa de; Bi şiarê ‘Ez nêwazena ziwanê mi vîndî bibo’, ma do bi beşdarîya heme dormereyanê ke nêwazenê Zazakî vîndî bibo û bi hawayêko girseyî, Unesco, Serekkomarîye û Wezaretê Perwerdeyê Millîyî rê mektuban bierşawê.

Semedê xurtbîyayîşê xebate; ma do bi beşdarîya heme dormereyanê ke nêwazenê Zazakî vîndî bibo, do kêfweş bibê.