Şerê DYA û Îranî rojeva medyayê ereban o
Çimdaran diyar kerd ke xozaya asîmetrîke ya şerê mabênê DYA û Îranî verê çareserîyêka leze gêna. Tehran rexmê vîndîbîyayîşanê xo zî operasyonanê xo domneno, eynî wext de zexto leşkerî û aborî yê Amerîka zêde beno. Goreyê çimdaran, peynîardişê nê şerî, amadebîyayîşê Tehranî yê seba reyna ercnayîşê polîtîkayanê ci ra pabeste yo.
Medyayê ereban hûmaranê xo yê na şewdire de, ca da şerê mabênê Îran û DYA û bandoranê ci yê herême. Kovara El Meceleyî derheqê şerê mabênê Îran û DYA de destnîşan kerd ke peynîardişê nê şerî bi kerdiş û nêkerdişanê rejîmê Îranî ra pabeste yo. Ame vatene ke şerê asîmetrîkî rayîr nêdanê çareserîyêka raşteraşt û leze. Hetê kêmhêzî heta ke eşkenê şerî dewam bikerê, eke bi hacetanê sînordaran û mesrefêkê berzî zî bo, eşkenê îdîaya serkewtene bikerê.
Goreyê kovare, no tewirê şerî bêhembetîya leşkerîye derbaz keno û ferqanê nêrînê sîyasî û stratejîkî zî gêno xo mîyan. Kovare destnîşan kerd ke DYA sey hêzêkê mîyanneteweyîyî têgêrena ke wazena bandora xo xurt bikero, eynî wext de rejîmê Îranî dîqet anceno pawitişê estbîyayîşê xo yê sîyasî û îdeolojîkî ser.
Heto bîn ra dîyar kerd ke Tehran rexmê kêmîya bandora xo ya herêmîye û sînordarîya hempeymananê xo de, yew wezîyetêkê înkarkarayîşî de yo, coka paştgirîya hêzanê mîyanneteweyîyan yan zî herêmîyan qey ey endî raşt nîya, çunke bandora nê cepheyan kêm bîya.
Rojnameyê El Neharî diyar kerd ke Îran wezîyetêkê rijîyayîşî de yo. Ame vatene "Tewirê ci yê dîplomatîkî dîyar nîyo. Rayînan mûzakerayan red keno û rayan zî qebul keno. No nêzdîbîyayîş tengeyîya zerreyî û çinbîyayîşê zelalîye yê stratejîya ci mojneno ra."
Derheqê tewirê DYA de zî rojnameyî no ercnayîş kerd "Rexmê wişkbîyayîşê xo zî, heta astêk pragmatîzm mojneno ra. DYA bal anceno armancêkê taybetî ser o, o zî rayîr nêdo ke Îran çekanê nukleerîyan bivisno dest. Bi nê qeydeyî armancanê hîrayan yê ke destpêkê şerî de dîyar kerdîbî ra, xo apey anceno."
Rojnameyî bandora bêtevgêrayîşê Amerîka-Îranî yê serê Lubnanî ercnaye û diyar kerd ke "No wezîyetê bêtevgêrayîşîye xizmetê aramîya welatî nêkeno. Şerê dewamkerdoxî derfetanê resayîşê çareserîyanê sîyasîyan apey fînenê. Eynî wext de, pîya bi lawazîya rewşanê aborî û darayîyan, şero dewamkerdox îhtîmalê krîzî zêde keno, coka her teqayîşo newe qey Lubnanî do tehlûke bo."
'Xeyalê şerêkê dergkerdeyî'
Rojnameyê Şerq El Ewsatî zî derheqê eynî babetî de destnîşan kerd ke şerî 4 xeyalê ke bi destpêkê ci reyde bîyî, eşkera kerdî û wina dewam kerd "Yê tewr muhîm zî bawerîya bi îhtîmalê çareserîyêka leze. La, wezîyetî mojna ra ke şer dewam keno û rejîmê Îranî amade yo ke rexmê vîndîbîyayîşan dewam bikero. Dorpêçê aborî zî rexmê giranîya xo, beno ke nêbo sebebê welişîyayîşêkê lezî, çunke aborîya Îranî bi xoserîya nîsbîye û kanalanê bazirganîye yê alternatîfan ra pabeste ya."
