Uçar: Ma do ameyoxêko azad awan bikerê

Konferansê Cinîyan ê Îdareyanê Herêmîyan ê Demokratîkan o ke hetê Heyetê Îdareyanê Herêmîyan ê Demokratîkan ê Dem Partîye ra organîze beno, Amed de Salona Konferansî ya Alî Emîrî de virazîyêno.

Konferanso ke zaf sîyasetmedarê cinîyî tewrê ci bîyî de Hemsereka Yewîya Şaredarîyanê Anadolîya Başûrê Rojhelatî (GABB) û Hemsereka Şaredarîya Şaristanê Girdî ya Wanî Neslîhane Şedal a ke herinda ci de qeyûm ameyo tayînkerdene, wina qisey kerd: “Ma zey heme waran îdareyanê herêmîyan de zî çarçewaya paradîgmaya demokratîke, ekolojîke û azadîya cinîyan de komel de estê. Ma vanê, şaristanê azadî pê nê hişmendîye eşkenê bêrê afernayene. Ma zî pê nê bawerîye do konferansê xo virażê.”

Hemsereka Pêroyî ya Partîya Herêman a Demokratîke (DBP) Çigdeme Kılıçgun Uçare zî qiseykerdişê xo de vat, “Ma cinîyanê ke ma eşkenê bi rayîrê îdareyanê herêmîyan komareya demokratîke, ameyoxêko azad awan bikerê reyde yew ca de yê.”

‘Hemserekîye demokratîkbîyayîşê sîyasetî ya’

Çigdeme Kılıçgun Uçar a ke qala pergalê hemserekîye kerd ke ê esas genê, nê çîyî ardî ziwan:

“Hemserekîye tena tehsîskerdeyîşê qoltuxî yê seba cinîyan nîya. Hemserekîye demokratîkbîyayîşê sîyasetî ya. Vera aqilê camêrdan de zekerdişê pratîkê aqilê demokratîkî û zafcayî yo. Hemserekîye ewro sîyaseto ke bi qeyûmî, bi betalbîyayîşê mutlaqî ma gêno cenderê, verênîya cinîyan de reyna awankerdene ya. Kurdîstan de şîddeto tewr pîl o ke yeno dîyene ra yew zî qeyûm o.

Îdareyê herêmîyî, warameyîşê dewlete yê seba herêmî yê yan zî xo-îdarekerdişê îdareyanê herêmîyan ê? Tîya de cumleya krîtîke komun a. Çîyo ke ma vanê komun, bi nê nasnameyî têwdayîşê aqilê kolektîfî, xebitîyayîşê kolektîfî, sîyasetê kolektîfî yo.

Demê neweyî de gamê tewr muhîmî ke ganî bêrê eştene ra yew zî bi perspektîfê azadîwazî yê cinîyan têgerîyayîş o. Birêz Ocalan vano; ‘Tarîxo raştîqîn ê cinîyan, tarîxê komunal ê heme komelî yo’. Wexto ke ma ewnîyenê tarîxê têkoşînê cinîyan ra, çîyo tewr temel komunalbîyayîş û verênîya cinîyan de awankerdişê nê çîyî yo. Ma zey cinîyê ke sîyê qeyûmî ra rîsipî vejîyayê, pîya yê.”

Rahmî Koç û nefeqeyî rê bertek

Çigdeme Kılıçgun Uçar a ke vera qiseyanê wayîrê Koç Holdîngî Rahmî Koçî yê derheqê cinîyanê kurdan de ke vizêr akerdişê nêweşxaneyî de vatbî, tepkîyê xo mojna û wina vat: “Rahmî Koçî bi raştî a fiqra reyde xo da şinasnayene. Feqîrîya feraset û zanayîşê însanî, mojnenê ra ke ma kam pergalî reyde têrî yê. Ma do nê pergalê camêrdan ke heta çim erzeno nefeqeyê 370 TLyî yê cinîyan, bivurnê. Ma do bivurnê ke, ma do seba ke tu neslo ke dima ma ra yeno, maruzê tu şîddetî nêmano, têkoşîn bikerê.”