Vengê Aytene, dêsanê Gebze ra derbas bi û kewt zerrîya komelî

Lêl Amed

Tecrîd, teyna qutkerdişê têkiliya merdimî ya bi dinya nîyo; eynî wext de pergalêko winayî yo ke wazeno xeniqnayîşê îradeyî pê bîyaro. Vera nê sîstemê bêbextî de, zîndanan de bi desan hepsîyayan bedelê giranî dayî. Ayten Behçete zî nê hepsîyayan ra yewe bîye. Aye 23ê Adara 2019î de, Zîndanê Cinîyan ê Gebze de, seba ke tecrîdo ke îradeyê komelî ser o ferz beno bişikno, bedelê tewr giran da û weşîya xo feda kerde. Çalakîya Ayten Behçete, teyna qedînayîşê yew weşîye nîya; eynî wext de qîrayîşêko xurt o ke vera tarîtîya tecrîdî de ameyo kerdene û peyê xo de mesajêko xorîn veradayo.

Ayten Behçete, weşîya xo ya 24 serre de zaf çîyî dîyî. Ciwanîya aye mîyanê têkoşîn û raştîya welatî de vîyarte. Zîndan, ca û mekanêko wina yo ke sîstem wazeno tede îradeyê merdiman teslîm bîgêro, înan bêveng û bêhêvî verado. La Ayten Behçete û embazê aye, zîndan kerd cayê xoverdayîşî. Wexto ke polîtîkaya tecrîdî bîye xorî û bêvengîya teberî bîye pîl, qerar da ke bedenê xo bikera çeka xoverdayîşî. Çalakîya Ayten Behçete, na bêvengîya komelî rê yew serewedartiş û hişyarkerdiş bi. Aye, bi feda kerdene canê xo, kerd ke vengê aye dêsanê kerreyînan ê zîndanî ra bivejîyo û bireso heme dinya.

Merdim eşkeno biperso: "Çira yew ciwana 24 serre canê xo feda kena?" Verpersê nê persî, girîngî û giranîya rûmetê merdimayîye de nimite yo. Weşîye, eke bê rûmet, binê nêheqîye û mîyanê tecrîdî de bêra ciwîyayene, manaya xo vînî kena. Ayten Behçete bi çalakîya xo mojna ke, weşîyêka rûmetêne û azade her çî ra muhîm a. Aye nêwaşt ke mîyanê şertanê tecrîdî de teslîm bibo û serê xo bişikno. Bedenê xo kerd pirdêko giran ke reseno azadîye. Mektuba ke aye peyê xo de veradaye de, na raştîye zaf zelal asena. Aye waşt ke komel hewn ra hişyar bibo, çimê xo akero û wayîrê îrade û xoverdayîşî vejîyo.

Ewro, çalakîya Ayten Behçete sey yew vîrardişê xoverdayîşî û qîymetdayîşê rûmetî tarîx de ca gêna. Sîstemê tecrîdî hema zî tewir bi tewir dewam keno, la vîr û qerarê ciwananê sey Aytene zî mîyanê têkoşînî de ciwîyeno. Çalakîya aye, ma rê mojnena ke giranîya tecrîdî çiqas pîl a û bedelê edalet û azadîye çiqas giran o. Ayten Behçete, weşîya xo ya kilme de manayêko zaf xorî ard meydan. Aye mojna ke, wexto ke heqê qiseykerdiş û ciwîyayîşî destê merdimî ra yeno girewtene, canê merdimî beno mesajo tewr o xurt. Vengê aye, dêsanê Gebze ra derbas bi û kewt zerrîya komelî. Heta ke tecrîd û nêheqîye bibê, vîrardişê na çalakîye do qet xo vîrî ra nêşêro û tim ma rê bibo rayber.