Yilmaz Çerçel badê 33 serran zindan ra ame veradayene
Yilmaz Çerçel badê tepiştişê 33 serran Hepisxaneyê Tîpê Hyî yê Eskîşehîrî ra ame veradayene.
Tepişteyo bi nêweşîya girane Yilmaz Çerçel ke 33 serrî hepisxane de mend û veradayîşê ci 6 rey hetê Heyetê Îdare û Çimdarîya Hepisxaneyî ra ame taloqkerdene, Hepisxaneyê Girewteyeyî yê Tîpê Hyî yê Eskîşehîrî ra ame veradayene. Çerçel, vernîya berê hepisxane de hetê keyê keyeyê ci, îdarekarê Rêxistina Şaristanî ya DEM Partî û Temsîlkarê Anatolyaya Zereyî yê MED TUHAD-FEDî Enver Tekî ra ame pêşwazîkerdene.
Tekî badê pêşwazî qisey kerd û vat ke veradayîşê tepişteyan keyfweşî dano la waşt ke bi taybetî tepişteyê nêweşî û heme tepişteyê sîyasî bêrê veradayene. Tekî derheqê Prosesê Haştî û Komelê Demokratîkî de zî vat: "Ma wazenê ke bi serûberkerdişê qanûnî lezabez embazê ma yê hepisxaneyan bivejîyê."
Yilmaz Çerçel kam o?
Yilmaz Çerçel 17ê adare 1993î de Amed de ame tepiştene. Çerçel Hepisxaneyanê Girewteyan ê Tîpê Hyî yê Amed, Bartin û Eskîşehîrî de ame tepiştene. Bi sebebê problemanê weşîye înfazê Çerçelî mîyanê serranê 2004-2006î de ame taloqkerdene. Çerçel mîyanê serranê 2008-2012î de Nêweşxaneyê Nêweşîyanê Ruh û Sînîran ê Bakirkoyî de tedawî bî û destê ey o çep nêtepîşeno.
