Abdullah Ocalan: O dêsê Rojawanî de yew kerrayo bingeyîn bi
Abdullah Ocalanî sero koçê peyênî yê sîyasetmedarê kurdî Salîh Muslîmî yew mesajê serweşîye weşana. Rayberê Şarê Kurdî Abdullah Ocalanî mesajê xo yê Îmraliyî de da zanayene ke Muslîm do sey estareyêko bêmerg yê têkoşînî bimano û şehadetê ey do şaran xurtêr bikero
Eşkerakerdişê koçê peyênî yê sîyasetmedarê Kurdî Salîh Muslîmî ra dima, Rayberê Şarê Kurdî Abdullah Ocalanî Girawa Îmraliyî ra yew mesajê vîrardişî pare kerd. Rayberê Şarê Kurdî Abdullah Ocalanî mesajê xo de bal ant embazîye, têkoşîn û cuyê Salih Muslîmî ser o ke seba way û birayîya şaran feda kerdbi û ey sey yew welatperwero raştikên pênase kerd.
Mesajê Rayberê Şarê Kurdî Abdullah Ocalanî wina yo:
“Wexto ke Embaz Salîh Muslîm na dinya ra koç keno
Mi xebera koçê peyênî yê embazê xo yo ercîyaye Salîh Muslîmî şan de eşnawit. Mi heta şefeqî o û têkoşînê ey vîrî ardî. Bêguman, lajê ey, merdimê ey û hemê embazên ey rê, o êdî bêmerg o. Ey layîqê şar û welatê xo yew cuye vîyarnê ra û bi bêmerg.
O yew welatperwero raştikên yê herra Sûrîyeyî bi. O kurdan reyde bîyêne yew kurdo temam; ereban reyde bîyêne yew embazo nêabirîyaye; Tirkan reyde bîyêne yew birayo heq. Ey asûrî, ermenî, çerkesî zî tede bi her etnisîte, dîn û mezheban reyde awankerdişê yew famkerdişo merdimaneyo bêkêmanî, kerd yew qismo muhîm yê cuyê xo.
O dêsê Rojawanî de yew kerrayo bingeyîn bi ke ez her tim pê bawer bîya û o do her û daîm wina bimano. Ez ey sey embazê Sirri Sureyyayî vînena ke Pêvajoya Aştîye û Komela Demokratîke de mîyanê ma ra bar kerd. O do nê bingeyî ser o, sey estareyêko bêmerg yê têkoşîn û aştîya ma bimano.
Şehadetê Salih Muslîmî yew vîndîbîyayîş nîyo. Eksê nê, o do heta ebed şarê xo, hemê şaran, neteweyan, dost û embazên ma sey yew hêzêko heqîqî xurt bikero.
Abdullah OCALAN
12 Adar 2026
Girawa Îmraliyî”
