Awazê Çiya ra seba Newroza 2026î klîbêko newe: 'Newroza Azadîye'

Koma Awazê Çiya seba Newroza 2026î, ya ke bi sloganê “Newroza Azadîye û Yewîya Demokratîke” yena pîrozkerdene, klîbêko newe bi nameyê “Newroza Azadîye” amade kerd. Koma Awazê Çiya serrgêra 2638ine ya Newroze de, na “Newroza Azadîye” verî Rayberê Şarê Kurdî Abdullah Ocalanî rê û dima zî heme cangorîyanê têkoşînê azadîye rê pîroz kerde.

Awazê Çiya da zanayene ke demêko ke azadîya fizîkîye ya Abdullah Ocalanî û şarê kurdî zaf nêzdî ya, ê her wextî ra zêdêr bi heyecanêko pîl na Newroze pêşwazî kenê. Eşkerayîye de wina ame vatene: “Wextêko ke çar parçeyanê Kurdîstanî û teberê welatî de şarê ma mîyanê yewbîyayîşî de yo, hetê zîhnîyetê neteweyî ra ma prosesêko tarîxî ra vîyarenê. Sînorê îşxalkeran ê ke serê cografyaya Kurdîstanî de ameyê ronaene, pê têkoşînê seba azadîye û yewîye her roje parçe benê û bêmane manenê. Têkoşînê 53 serran ê Rayber Apoyî şarê ma resna na dereca. Wext ameyo ke şarê kurdî mîyanê şaranê dinya de bi hewayêko birûmet cayê xo bigêro. Kurd û Kurdîstan bîyê rastîyêka ebedîye. Pê coşê pîlî yê Newroza 2026î, ma xoverdayîşê şarê xo yê Kurdîstanî û heme hetanê dinya selam kenê û Newroza înan zerrî ra pîroz kenê.”

Koma Awazê Çiya eşkerayîya xo wina qedênê: “Seba keda şehîdan û şarê ma yê qehremanî, seba ke biba dilopêk mîyanê okyanûsî de, sey Awazê Çiya ma bi hunerê xo wazenê na Newroze pêşwazî bikerê û ci rê pêşengîye bikerê. Coka ma berhemê xo yo newe ke bi nameyê ‘Newroza Azadîye’ amade kerdo, dîyarîyê şarê xo kenê. Ma reyna sey hunermendanê şorişê azadîye, roşanê her kesê ke zerrîya înan seba azadîye pirodana û kede danê, pîroz kenê. Wa her roja şima sey Newroze bo.”