AYM tepişyayîşê ciwananê HDP’yî sey ‘îxlal’ hesibna
Mehkemeya Qanûnê Bingeyî (AYM) derheqê tepişyayîşê endamanê Meclîsê Ciwanan ê HDP’yî Livan Orman û Ahmet Beyazitî de qerarê “îxlalî” daye
Çarçewaya tehqîqatêkê Serdozgerîya Komare ya Stenbolî de 29ê Temmuza 2022yî de eştbî keyeyanê îdarekeranê Partîya Demokratîke ya Şaran (HDP). Operasyon de Endamê Meclîsê Partîye (PM) Livan Orman, Ahmet Beyazit û hîrê kesê bînî ameybî tepiştene. Mehkemeya Stenbolî bi îdîaya “endamîya rêxistine” dewa akerde û Orman û Beyazit êlula 2022yî de ameyî veradayene.
Pêvajoyê dewaye de pawitoxanê înan bi sebebê "heqê azadîye û asayîşî ameyo îxlalkerdene" serê AYM’yî kerd. AYM’yî qerarê xo eşkera kerd û no sey "îxlal" hesibna.
Qerarê AYM’yî de ame vatene ke; sebebê tepişyayîşî tewrbîyayîşê çalakîyan, eşkerayîyê çapemenîye û qeydê telefonî yê. La dîyar bi ke nê çalakîyan de qestê şîdetî çin o û derheqê talîmatê rêxistine de zî qet yew delîlo şênber çin o. Qerar de ame îfadekerdene ke mesajêkê sey ‘Ma do bêrê tîya ra çîyêk bigêrê’ yê Livan Ormanî sey delîl ameyo hesibnayene, la no semedê fealîyetêkê rêxistinî bes nîyo û bi temamî “ferzkerdiş” ser o awan bîyo. Seba Ahmet Beyazitî zî ame vatene ke grûba Telegramî û dokumanî sey delîl nîşan dîyayî, la înan de teşwîqê şîdetî çin o û nêeşkîyeno bibe delîlê endamîya rêxistine.
Peynîye de AYM’yî qerar da ke şikê sûcî yê qewetînî nêameyî îspatkerdene, coka goreyê maddeya 19ine ya Qanûnê Bingeyî heqê azadîye û asayîşî ameyo îxlalkerdene. Reyna qerar dîya ke wa Orman û Beyazitî rê tazmînato maddî û manewî bêro dayene.
