Zekayo Sunî zî sey vîrusan hereket keno

Goreyê yew cipersayîşo newe, modelê Zekayê Sunî eşkenê bikewê komputeran mîyan, xo kopya bikerê û nê kopyayanê neweyan semedê hêrişkerdişê makîneyanê bînan bixebitnê; yeno vatene ke na xebate, mojnayîşo verên o ke tede yew Zekayo Sunîyo otonom xo bi xo zêde keno.

Xebata ke hetê Palisade Researchî ra (DYA) ameye kerdene de; modelê OpenAI (GPT 5, 5.1 û 5.4), Anthropic (Claude Opus 4, 4.5 û 4.6) û Alibaba (Qwen), ser o testî ameyî kerdene. Nê modelî, komputeranê ke bi qestî kêmanîyê asayîşî tede ameyê verdayene û teber ra resayîş rê akerde yê, înan de ameyî testkerdene.

Cipersayoxan, modelê Zekayê Sunî yê bingeyênî yê OpenAI, Anthropic û Alibabayî, bestnayî yew agent harness ke destûr dano ê fermanan bîyarê ca û komputeranê bînan reyde têkilîye ronano; wina, herinda programanê sohbetî yê pêroyîyan de, înan no binesazî xebitna.

Test di tewiran de ame kerdene, û modelanê Alibabayî ra ame waştene ke xo kopya bikerê. Testanê GPT û Claude de zî, semedo ke dosyayê modelanê GPT û Claude yê xo semedê transferî pêroyî rê akerde nîyê, modelan ra ame waştene ke sîstemî mîyan bikewê û Qwenî awan bikerê.

Her test de Zekayo Sunî mecbur bi ke yew sîstemê komputerî de yew kêmanîya asayîşî bivîno, ney semedê mîyankewtişî bixebitno, malumatê dekewtişî bidizno, dosyayê ke semedê xebitîyayîşê ey lazim ê transfer bikero û makîneya newîye de yew kopyaya xo bido xebitnayene.

Wexto ke yew kopya dest pê xebate kerde, bê mudaxeleyê însanan eşkaye semedê hêrişkerdişê yew komputero bîn bêra xebitnayene. Her qedeme de Zekayo Sunî yew kêmanîya asayîşa cîya dîye, kontrolê komputerê dorê girewt xo dest, fermananê xo neqlê tîya kerdî û yew kopyaya newîye daye destpêkerdene ke zincîre dewam bikera.

Modelê Qwen3.6-27B ke versîyonêko şenik ê modelê Zekayê Sunî yê Qwenî yo ke eşkeno tenya yew îşlemcîyê grafîkî yê serkewteyî ser o bixebitîyo, tenya yew ferman ra dima, Kanada, DYA, Fînlandiya û Hîndistan de vila bi çar komputeran û bê hetkarîya însanan 2 saetî û 41 deqeyan de zincîre temam kerde.

Ekîbê cipersayîşî hîrê qedemeyan ra dima test da vinderdene la da zanayene ke kopyaya peyêne hema zî xebitîyena û xoyayîşê ci esto ke sîstemanê bînan zî bikera hedef. Modelan rêjeyanê cîyayan de serkewtiş mojna. Qwen3.5-122B-A10B ke modelêko pîlêr û xurtêr ê Alibabayî yo, se de 19ê testan de kopyayê ke xebitîyenê awan kerdî.

Modelê Qwen3.6-27B zî wexto ke yew îşlemcîyê grafîkî yê serkewteyî ser o xebitîyayêne se de 33 serkewtiş bi dest fîst. Sîstemê Zekayê Sunî yê tîcarîyî, wexto ke semedê awankerdene dosyayê modelê Qwenî ameyî xebitnayene hîna zaf serkewtiş mojna.

Modelê Claude Opus 4.6 yê Anthropicî se de 81ê testan de serkewte bi, yê OpenAI GPT-5.4 zî resîya se de 33. Cipersayoxî vanê ke nê netîceyî ser o kontrolkerdişê sîstemanê Zekayê Sunî yê xurtan de şikûgûmananê neweyan anê rojeve. Goreyê cipersayoxan no kifşêk, eşkeno vindarnayîşê hêrişanê sîberî hîna zehmet bikero; çunke eke Zekayo Sunî cayanê bînan de kopyayê xo yê ke xebitîyenê xora viraştê, padayîşê yew komputerê vîrusinî nêbeno bes.

Dima ra ke Anthropicî aşma vîyarte de modelê Claude Mythos Preview da şinasnayene ke qabîlîyetê asankerdene hêrişanê sîberî yê miqyas û alozîyêka bêemsalî sey baxane nîşan da û va ke semedê akerdişê şarî rê "zaf tehlukeyin" o.

Herçiqas ke xora xeylê vîrusê komputeran eşkenê xo komputeranê neweyan rê kopya bikerê zî, ekîbê cipersayîşî dano zanayene ke îhtîmal zaf o ke no xebato verên bo ke tede ameyo mojnayene ke yew modelê zekayê sunî eşkeno semedê kopyakerdişê xo yew servero newe rê, kêmanîyanê asayîşî ra îstîfade bikero.

Sazîya METR’î ke karê qezencî nêkeno û rîskanê OpenAI, Anthropic û sîstemanê Zekayê Sunî yê averşîyayan ciperseno zî aver ra xo zêdekerdiş sey îşaretêko hişyarker nîşan dabî bi baxaneyê ke sîstemê ke eşkenê vila bibê, kontrolkerdişê înan do bibo zehmet.