Dêrsime: Amancê ma azadbîyayîşê fîzîkî yê Rayberê ma yo

Endama Koordînasyonê PAJK’yî Aytene Dêrsim Medya Haber TV’yî de beşdarê programêko taybetî bîye û 8ê Adare, mesajê Rayberê Şarê Kurdî Abdullah Ocalanî yê Têgêrayîşê Cinîyan rê û hêrişanê Îranî ser o qisey kerd.

Dêrsime vat ke mesajê Rayberê Şarê Kurdî Abdullah Ocalanî yê 8ê Adare seba înan dîyarîyêk bî û vat: "Rayberîye seba cinîyan rolê pêşengtîya aştîye da. Çunke berpirsîyarîya vurnayîşê na dinya milanê cinîyan ser o ya." Dêrsime ard vîrî ke Rayberê Şarê Kurdî Abdullah Ocalanî Îmrali de 27 serran de asaretî de têkoşînê Têgêrayîşê Cinîyan hertim xorînêr kerd û bî roşnîya înan.

Dêrsime seba heme cinîyan Newroze pîroz kerd û vat: "Newroze ruhê xoverdayîşî yo, ruhê serewedartişî yo, ruhê şorişî yo. Bê guman no têkoşîn û no adir nêpeysêno. No adir gird bi û heme şarî, heme cinîyî û heme merdimanê birûmetan dormeyê xo de ard pêser."

Derheqê şerê Amerîka û Îsraîlî yê Îranî de Dêrsime vat ke no şer tena Rojhelatê Mîyanênî nê, heme dinya eleqedar keno û cinîyî û qijî tewr zaf nê şerî ra tesîr gênê. Dêrsime dîyar kerd ke rejîmê molayan ganî bivurîyo la nê vurîyayîşî bi îradeyê şaranê Îranî û cinîyanê Îranî mumkun o. Bi mudaxelayê teberî nê. Dêrsime bale ante ke serewedartişê Jin Jiyan Azadîye nêqedîya û vat: "Amerîka û Îsraîl xelaskar nîyê, amancê înan hegemonî yo û no şer seba şarî vînkerdiş o."

Dêrsime vat ke 8ê Adare bi xoverdayîşê cinîyan ameyo qezenckerdene û no mîras ganî hertim bêro wayîrvejîyayene. Dêrsime bale ante ke cinîyî ganî rêxistinbîyaye bibê û îfade kerd ke Rayberê Şarê Kurdî Abdullah Ocalanî komûnê cinîyan ser o zaf vindert û vat: "Cinîyî xo bi xo rêxistin bikerê, xo bi xo bipawê û xo bi xo çareserîya xo bîyarê caardene. Kesêk seba cinîyan qerar nêdo, cinîyî ganî bi xo qerarê xo bidê." Dêrsime vat ke komkiştişê cinîyan ewro zî dewam keno û vera normalîzekerdişê naye ganî heme rojî bibê roja têkoşînê cinîyan.

Dêrsime peynî de Newroze, ruhê prosesê Aştî û Komelê Demokratîkî reyde girê da û vat: "Heme cinîyî ganî bi rengê xo, bi vengê xo û bi îradeyê xo ya azadî waranê Newroze de bibê. Amancê ma azadbîyayîşê fîzîkî yê Rayberê ma yo. No têkoşîn do dewam bikero."