'Ganî azadîya Rayber Apoyî û yewîya demokratîke ya kurdan bêro caardene'
Gerîla û fermandarê ke koyanê Kurdîstanî de tewrê şayîya Newroze bîyî, semedê caardişê azadîya Rayberê Şarê Kurdî Abdullah Ocalanî û yewîya demokratîke ya şarê kurdî veng da
Koyanê Kurdîstanî de Newroze bi şîarê ''Rayber Apoyî rê azadîye û yewîya kurdan'' yena pîrozkerdene. Şayîye de fermandare Gulîstane Gulhat qisey kerd. Gulhate ard ziwan ke fîkrê Rayberê Şarê Kurdî Abdullah Ocalanî mifteyê çareserîye yê û vat ganî her kes wayîrê azadîya ey bivejîyo.
Dima ra progremê şayî dest pê kerd. Gerîlayan dormeyê adirê de govende girewt. Badê şayîye fermandaranê gerîlayan derheqê Newroze de hîsê xo ardî ziwan. Mesajê înan de azadîye, yewîye û aştîye vejîyayî vernî.
Fermandar Zinar Korkmazî îfade kerd ke semedê kurdan roja yewîye û xoverdayîşî ya û vat ê wazenê proseso ke ame destpêkerdene bê rişnayîşê gonî bibo temam.
Fermandar Nûrhaq Erdal zî vat Newroza emserrî hetê aştîye û têkoşînê demokratîkî ra yena manaya destpêkerdişêkê neweyî.
Fermandar Kazim Botanî zî vat eke estbîyayîşê kurdan nêro naskerdene do pêkewtişî dewam bikerê û semedê çareserî veng da.
Gerîlaya YJA Starî Amara Cûdî zî ard ziwan ke waştişê înan azadîya fîzîkîye ya Rayberê Şarê Kurdî Abdullah Ocalanî ya.
Gerîlaya YJA Starî Roza Dersim zî vat Newoze do bibo vesîleya azadîya Rayberê Şarê Kurdî Abdullah Ocalanî.
