Hedef tenya Helep nîyo
Wexto ke Tirkîye xebitîyêne ke Îsraîlî reyde pê biko, Rojawan û kurdî bi karkerdişê koordîneyî yê Îsraîlî reyde sûcdar kerdî. Bi dezenformasyonî waşt ke algi bivirazo. Balkêş o; roja ke Îsraîl û Sûrîye Parîs de pêvînayîş kerd û tayê babetan de pêkerdî, a roje hêrişê vera taxanê Şêxmeqsûd û Eşrefîye yê Helebî (ke binê dorpêçî de bîyî) dest pêkerd. Îhtîmal çin o ke no hêriş bê teyîdê DYA biqewimîyo. DYA seba hêrişî çira keske ya kerd.
Dewleta Tirkan, hêrişo ke Sûrîye de plan kerdêne, vist pratîk. taxanê kurdan ê Helebî ra çeteyê xo reyde hêriş kerdî û bi seyan welatperwer qetil kerdî. Yeno zanayene ke hedef tenya Heleb nîyo, hedef bi temamî qedînayîşê estbîyayîş û destfînayanê kurdan o. Hewcedarîya Sûrîye bi şer û qirkerdişanê neweyan çin bîye. Welatêko ke rîjîyayo û birînê xo nêpişê, reyna kaşkerdişê felaketî, teberê dişmenîya xorîne de tu îzahê xo çin o. Dewleta Tirkan estbîyayîşê şarê kurdî nas nêkerd û înkarî ra fek vera nêda.
Sûrîye de bi pêşengîya kurdan vera DAIŞ’î têkoşînêk ame rayraberdene. Rejîmê BAAS’î rîjîya. No seba nê şarî destfînayêko pîl bi. Dewleta Tirkan zî şar, azadîye û demokrasî dayî kuncêk û hema vat dişmenîya kurdan. Rayberîya Xosere û hêzê pawitişî QSD’î her tim girewtî hedefê tesfîyeyî. Wezîrê Karanê Teberî yê Tirkan Hakan Fîdan, wezîfedarêko ke şerê psîkolojîkî û dezenformasyonî de bîyo hosta. QSD yo ke Dinya de kes sey 'rêxistina terorî' nêvîneno, ey her tim sey 'rêxistina PKK’î' daye şuxulnayene û sey 'terorîst' ferz kerd. Seba naye Dinya de hêzo ke tede îtîfaq û bazarî nêkerda nêmend. DAIŞ’î ra bigêrê heta DYA û Ewropa, heta Îsraîlî her hêzî reyde waşt ke pê biko. Nê demanê peyênan de waştêne ke nakokîyanê xo yê Îsraîlî reyde nerm bikerê û biresê netîceyêk. Seba naye DYA viste dewre. Erdoganî, HAMAS û dawa Fîlîstînî rotî. Seba ke HAMAS’î razî bikero, wezîfe girewt. HAMAS do çekanê xo biverado, Xezze de îdare do çin bo. Aşkera yo ke no tesfîyeyê HAMAS’î yo. Vera naye de zî waşt ke seba hêrişê Kurdan DYA ra destûr bigêro.
Dewleta Tirkan organîze kerd
Wexto ke Tirkîye xebitîyêne ke Îsraîlî reyde pê biko, Rojawan û kurdî bi karkerdişê koordîneyî yê Îsraîlî reyde sûcdar kerdî. Bi dezenformasyonî waşt ke algi bivirazo. Balkêş o; roja ke Îsraîl û Sûrîye Parîs de pêvînayîş kerd û tayê babetan de pêkerdî, a roje hêrişê vera taxanê Şêxmeqsûd û Eşrefîye yê Helebî (ke binê dorpêçî de bîyî) dest pêkerd. Îhtîmal çin o ke no hêriş bê teyîdê DYA biqewimîyo. DYA seba hêrişî çira keske ya kerd. Seba ke peymanê HTŞ û Îsraîlî rojdemê şarî ra biremnê, Heleb de vetişê şerî munasîb ame dîyene. Dima ke hêrişî dest pêkerd, heme rojdem bi nê şerî ame dekerdene.
Şerê Helebî, esasen şerêko ke Dewleta Tirkan organîze kerdo. Seba nê şerî sebebêk çin bi. Kêşaneyê şaristanî de di taxê ke kurdî tede ronişenê, seba kamî tehluke bîyî ke? Zaten zafê rey bi ambargoyê werdî binê dorpêçî de bîyî. 4ê aşme de Şam de mabênê rayberanê QSD û Wezaretê Pawitişî de pêvînayîşê entegrasyonî ameybî kerdene. Pêvînayîşî dewam kerdêne. Rayberanê Tirkî zî her tim gefî werdî QSD û Îdareyê Xoserî. Mesajanê serra newîye de dozê nê gefan zêdîya. Ma waşt ke bimojnê nê gefî normal nîyê.
Nêwazenê şerî biveradê destê HTŞ’î
Rayberê Tirkî, komplo û şerê taybetî de pispor ê. Verê cû zî Hakan Fîdanî vatbi "Ez di-hîrê kesan şawena hetê Sûrîye, Tirkîye ser o çend fuzeyan dana eştene û şerî dana destpêkerdene". Nika zî vanê "Eke HTŞ hereket bikero, ma seba hetkarîye amade yê". Gelo heme pirsgirêkê HTŞ hal bîyî, tenya kurdî mendî? No mesele mecbur o ke bi şer û pêrodayîş bêro çareserkerdene? Mutabakatê 10ê Adare ame îmzakerdene, dewletê sey DYA mabenkarî yê û pêvînayîşî dewam kenê. Vera naye de hukmatê tirkan çira hend lez keno û gefan varneno? Reyna, grûbê çekdarî yê ke sey leşkerê Sûrîye nîşan dano la girêdayeyê ey ê, dormeyê Helebî de ca kerdê. Şerê ke do bêro vetene nêwazeno biverdo destê HTŞ, wazeno karê xo garanti bikero.
Bi temamî amancê xo pakîya etnîkî ya
Heleb de wexto ke qet rojdem de çin bi, no hêriş aşkera yo ke hêrişêko normal nîyo. Dima ke BAAS kewt, waştî ke Rojawanê Firatî bêkurd biveradê. Hêrişê herêmanê sey Til Rifat û Şehba kerdî. Hêrişê nika yê Helebî bi temamî seba qirkerdiş û pakîya etnkî yo. Hedefê şerî zî tenya Heleb nîyo. Uca bêkurd biveradê, moralê şarî bişiknê û dima hêrişê herêmanê bînan zî bikerê. Bi seyan tank û wesayîtanê zirxinan dorpêçkerdiş û guleyvaranê di taxanê Helebî, sey meseleyêka asayîşî ya normale nêna dîyene. Amanc, şiknayîşê xoverdayîşê şarî, wedaritişê sazîbûyîn û pawitişê ci û akerdişê rayîrê qirkerdişî yo.
Şarê kurdî û dostê ci, hêzê ke terefgîrê aştî û demokrasî yê, vera qirkerdiş û îmhayê ke Heleb de dest pêkerdo û do vila bibo, ganî seferber bibê. Vera zanayîşanê manîpulatîfan û têmîyankerdişan ganî hîşyar bibê. Çi lazim o ke bêro kerdene, bi lezûbez ganî bêro kerdene.
