Zaf şaristanan de çalakîyê Roşanê Ziwanê Kurdkî pêk ameyî

15ê gulane Roşanê Ziwanê Kurdkî de çalakîyê panel, konser, atolye û programanê kulturî ke şaristananê Kurdistanî de yenê viraştene, tede bale ameye antene pawitişê kurdkî û resnayîşê neslanê ameyoxî ser o.

COLEMÊRG

Qezaya Geverê Colemêrgî de ZIMANGEH-DERî bi sernuşteyê "Ziwanê Kurdkî" panelêk viraşt. Nuştox Elîf Gemîcîoglu Yaviç û Qahîr Bateyî sey qiseykerdoxan beşdar bîyî.

Yaviçe vat ke bi serran o aye xebatê ziwan û cinîyan kerdî, kurdkî maya xo ra musaya û mîyanê Mayanê Haştî de bi serran xebate kerda. Yaviçe dîyar kerd kerd ke berhemê cinîyan zafane bi nameyanê camêrdan ameyî weşanayene û hunerê cinîyan ame peyeştene. Başûr de tay dengbêjê cinîyî bi nasnameyê camêrdîye ameyî naskerdene la cinîyan seba gandarîya kulturê fekkî dewam kerd. Yaviçe vat: "Ziwan û cuya Kurdistanî heta ewro bi rayîrê mayan ameyî pawitene."

Qahîr Bateyî vat ke sazgehê ziwanî seba şarê kurdan zaf muhîm ê û veng da ke herkes wayîrê nê sazgehan vejîyo. Bateyî vat: "Kurdkî bi hezaran serran o bi rayîrê mayan yena pawitene. Edebîyatê fekkî vîrê şarî yo."

WAN

Komela KURDÎGEHî de çalakîyanê ke 9ê gulane dest pêkerdbî, bi vilakerdişê vilawekan dewam kerd. Saeta Hunerî ya Şaredarîya Rêya Armûşê de standê kitabê kurdkî de pankartê "Em ê her derê bikin KURDÎGEH" ameyî aliqnayene. 

DÊRSIM

Platformê Şûbeyanê Dêrsimî yê KESKî seba gedeyan çalakîye viraşte. Gola Çetû de gedeyan beşdarê atolyeyê resm, muzîk, boyax û rîtmî bîyî, qumaşê sipîyan ser o resim viraşt û bi cuwa, sitil û darbuqayan kilamê kirmanckî û kurmancî vatî.

AMED

Şaredarîya Bajarê Neweyî bi şîarê "Bi veng, vatiş û vîrê kurdkî reyde ma yenê têhet" çalakîyê cîya-cîyayî viraştî. Kitabxaneyê Şarî yê Rojîn Kabaiş de dengbêjî, şîîr, muzîk, erbane û musabeqayê zanayîşî viraştî.

Program bi dengbêjîya Sidîkê Farqînî û Rêdur Serqanî, şîîr, muzîk û musabeqayanê zanayîşî yê kurdkî yê seba gedeyan dewam kerd.

REZAN

Meclîsê Ziwanî yê Şaredarîya Rezanî programê xo baxçeyê awanîya xizmetî de viraşt. Hemserekê Şaredarîya Rezanî Sîraç Çelîkî vat: "Ma wayîrê ziwan, kultur û estbîyayîşê xo bibê."

Çalakîye de nawitgehê resimî ame akerdene, şîîrî ameyî wendene, tîyatroyî ameyî kaykerdene. Mîyanê programî de gandarkerdişanê Feqîyê Teyran, Sûsîka Simo, Cegerxwîn, Eyşe Şan û Celadet Alî Bedirxanî bale ante.