Hunermend Suheyle Huseynîye ra xebere nîna girewtêne
Şaristanê Meşhedî de keyeyê Suheyle Huseynîye ser o hêriş ame kerdene. Hunermende Suheyla Huseynîye û mêrdê ci yo akademîsyen Ahmed Rahîmî ameyî destbendkerdene
Goreyê raporanê heqanê merdiman, 18ê Adare roja Çarşemeyî şaristanê Meşhedî de hêzanê rejîmê Îranî eşt yew keyeyî ser. Resam, edîtore û hunermende Suheyla Huseynîye û mêrdê ci yo akademîsyen Ahmed Rahîmî destbend kerdî.
Suheyla Huseynîye sey aktîvîstêka hunerî ya ke xebatanê xo yê warê xêzkerdiş û dîzaynî ra yena naskerdene. Mêrdê ci Dr. Ahmed Rahîmî zî warê zanistanê komputerî de yew endamo verên ê musnayîşî yo.
Ey Unîversîteya Montazerî, Unîversîteya Ferdowsî û Enstîtuya Musnayîşê Berzî ya Şandîzî yê Meşhedî de dersî dayî. Ahmed Rahîmî, wextê protestoyanê 2022yî de vera zextan de sey tepkî wezîfeyê xo ra îstîfa kerdebî. Sebebê destbendkerdişî, sûcdarîyê ke erziyayî înan ser û derheqê cayê tewqîfkerdişê nê di kesan de hema yew melumato hîra nêameyo parekerdene.
