Îlham Ehmede: Ma keda Rayber Apoyî selam kenê

Newrozê Amedî bi wendişê mesajanê sîyasetmedaran û dormeyanê cîya-cîyayan dewam keno.

Hemsereka Daîreya Têkilîyanê Teberî ya Rayberîya Xosere Îlham Ehmede yew mesajo vîdeoyîn erşawit.

‘Ma dî ke ma têna nîyê’

Mesajê Îlham Ehmede wina yo:

“Şaro kurd o ercîyaye û amedijê rûmetênî;

Roşanê şima firaz bo. Qamişlo ra heta Amed, Hewlêr û Mahabad, Newroza her kesî firaz ba. Rojawan de pêvajoya şoreşî de ma serrê zehmetî vîyarnayî. Çar parşeyanê Kurdîstanî de bi xoverdayîş û paştdayîşê pîlî yê pêro kurdan ma destkewteyê muhîmî fînayî dest. Ma waştêne bi destkewteyanê pîlêran nê prosesî tacîdar bikerê; bi qanûnan, bi fermîyet. Çi heyf ke ma prosesê giranêrî cîyayî. Reyna nê prosesanê giranan de ma dî ke ma têna nîyê. Pêro Kurdîstan de ma şarê xo kîşta xo de û peyê xo de dî. Semedê nê paştdayîşî ra ma reyna şima pêroyînan selam kenê.

Tarîxê kurdan de Newroz senî ke bîyo xelisîyayîş û rojeka newîye, Newroza 2026î zî şarê kurdî rê do biba Newroza newe.

Pêvajo do çareserîye bîyara

Tirkîya de Pêvajoya Aştîye û Komelê Demokratîkî dest pêkerd. Ma bawer kenê ke na pêvajo heqanê şarê kurdî yê Tirkîya rê do yew çareserîya sîyasîye bîyara.

Rojhelatê Kurdîstanî de reyna yew proseso newe yeno ciwîyayene. Peynîya rejîmê ke bi serran kurdî berdê darika darde kerdene, nêzîk bena. Yew proseso newe dest pêkeno. No proses, prosesê îtîfaq û yewîya şarê kurdî yo.

Pawitişê destkewteyanê Başûrê Kurdîstanî û pawitişê destkewteyanê ke uca de prosesê şoreşî de ameyê destfînayene, berpirsîyarîya pêro kurdan a.

Parşeyo tewr pîl yê Kurdîstanî Bakur o. Potansîyelo tewr pîl Tirkîya de yo. Coka kurdî çiqas ke paştî bidê yewbînan û kîşta yewbînan de vinderê, tarîx zî do reyna bêro nuştene. Paralelê nêyî, kurdî sîstemanê ke bi serran ê heqanê înan ra mehrûm veradayê, bêîrade kerdê, zext kerdê û teberê pergalî de veradayê, înan de do bibê wayîrê hêzî.

Ma bawer kenê ke kurdî vera pêro zext û zehmetîyan, vera dişmenîye zî do nê îradeyî bimojnê. Ê danê mojnayene zî. Pratîkê ci yeno dîyene. Îrade û hêzê kurdan vejîyeno werte.

Muhîmîya awankerdişî

Qonaxa tewr zehmete ya pêvajoya şoreşî awankerdîş a. Kurdîstanê Rojawanî de ma prosesê awankerdîşî de yê. Heman wext de Bakurê Kurdîstanî zî prosesê awankerdîşî de yo. Yew hetê parşeyanê bînan yê Kurdîstanî şoreş o, heto bîn zî awankerdîş o. Prosesanê awankerdîşî de rolê cinîyan pîl o. Tarîx de zî no ame dîyene. Nika zî rolê cinîyan bi nîsbetêko pîl vejîyeno vernî. Cinîyî û ciwanî kedeka pîye danê û fîdakarîye mojenenê. Zey pêro prosesê şoreşî, prosesê awankerdîşî de zî do cinîyî û ciwanî bibê wayîrê rolî.

‘Ma keda Rayber Apoyî selam kenê’

Bakurê Kurdîstanî de proseso sîyasî çiqas ke aver şoro, ameyoxê kurdanê parçeyanê bînan yê Kurdîstanî zî beno garantî. Hêzê kurdan yê Bakurê Kurdîstanî hêzêko pîl o. Wexto ke kewno têgêrayîş, zey sêlan herikîyeno. Na semed ra, pê pêro îmkanan seferberbîyayîşî reyde ma bawer kenê ke no proses do bireso serkewtişî. Fedakarîya pîle û keda pîle ke Rayber Apoyî daya mojnayene, ma pêro zerrîya xo ra selam kenê. Coka, ma dîyar kenê ke semedê serkewtiş û qanûnîbîyayîşê nê prosesî, ganî her ca de pêro îmkanî bêrê xizmet kerdene.

Ma şima selam kenê, Newroza şima bimbarek kenê. Ma bawer kenê ke serrê ke verê ma de yê, do bibê serrê naskerdişê estbîyayîşê kurdan, do bibê serrê bînê garantî girewtişê heqanê kurdan. Ma wazenê ke pêro tepişteyê sîyasîyî bêrê veradayene. Ma roşanê înan zî firaz kenê. Ma roşanê dayîkan û ciwanan firaz kenê.”