Karasu: Ganî heme şarê ma tewrê çalakîyanê protestoyê komployî bibo

Endamê Konseya Rayberdişî ya KCK’yî Mustafa Karasuyî roportajê xo yê taybetî yê ANF’yî de bale ante Komployê 15 Sibate ke ser û vat bi xoverdayîşê ''Şima nêeşkenê tîja ma tarî bikerî'' yê şarî komplo ame betalkerdene.

Karasuyî ard ziwan ke dewrê peyênî de bi hêrişanê vera Rojawanî bi hewayêkê hemwextî vera Paradîgmaya Netewa Demokratîke hêrişêko sîstemkî yeno rayra berdene û veng da şarî ke çar parçeyanê Kurdîstanî û her ca de wa tewrê çalakîyanê protestoyê komployî bibo.

Erjnayîşanê Mustafa Karasuyî ra qismêk wina yo:

''Komployê mîyanenteweyî ke bado ke 9ê teşrîna verêne ya 1998î de Rayber Apo Şamî ra ame vetene ame destpêkerdene 27 serrî xo dima veradayî. Bi na wesîle heme dewletî û hêzê sîyasîyî ke mîyanê komployî de ca genê, ma înan şermezar kenê.

Waştişê komployê mîyanneteweyî yê verênî eciqnayîşê fikr û têgêrayîşê şorişgêrî yê Rayberê Şarê Kurdî Abdullah Ocalan Apo bi. Ewro proseso ke 6ê çeleyî de Rojawan de vera kurdan ame destpêkerdene no zî bi waştişê tesfîyekeridşê têgêrayîşê azadîye yê Rayber Apoyî yeno kerdene. Hêrişê vera Îdareyê Xoserî yê Rojawanî têna vera kurdan nîyo, vera fehmê netewa demokratîke û paradîgmaya Rayber Apoyî yo.

Hêzê mîyaneteweyî Rayber Apo vera hegemonyaya xo sey tedîtî dî. Sere de Amerîka, Îsraîl û Îngîlîstan pîya komployo mîyannetweyî kerd. La şarê kurdî vera nê komployî têkoşîno gird da. Şar bi  xoverdayîşê 'Şima nêeşekê tîja ma tarî' bikerî wayîrê Rayber Apoyî vejîya. Rayber Apo gerîya binê esaretî la têkîlîya şarî bi Rayber Apoyî nêqerfîyaye, eqsê ci de dahîna xurtêr bi.

Fîkrê Rayber Apoyî Rojawan de bi famê netewa demokratîke ameyî caardene. Ereb, kurd, suryanî pîya ciwîyayî. No model semedê Rojhelatê Mîyanênî bi alternatîfêk. La no sîstemo demokratîk hetê hêzanê mîyanneteweyî ra sey tehlukeyî ame vînayene û ame waştene ke bêro tesfîyekerdene.

Famê netewe dewlete ra Rojhelatê Mîyanênî de tewr zaf kurdî zirar vînenê. Fehmê newtewe dewlete hetê kurdan ra polîtîkaya qirkerdişî ya. Alternatîfê ney netewa demokratîk a. Netewa demokratîke  yewca de azad û seypê ciwîyayîşê şaran, bawerîyan, nasnameyan o.  Îstîkrarê Rojhelatê Mîyanênî têna bi nê mumkun o.

Vera hêrişanê serê Rojawanî şarê ma çar parçeyanê Kurdîstanî de wirişt payan ser. No netîceya têkoşînê 50 serran a. PKK têgêrayîşêk o ke çar parçeyan de têkoşîn keno. Eke ewro Rojawan bi temamî nêame tesfîyekerdene, no xeyrê wayîrverjîyayîşê şarê ma û xeta Rayber Apoyî yo.

Ma serrgêra komployê mîyannetweyî de yê. Rayber Apo hema zî binê esaretî de yo. Nê 15ê sibate de ganî şarê ma her ca de payan ser bo. Azadîya Rayber Apoyî azadîya şarê kurdî ya. Wayîrvejîyayîşê Rojawanî, wayîrvejîyayîşê destkewteyanê kurdan o.

Ma vengdayîşê xo yê yewîya demokratîke ya semedê çar parçeyan newe kenê. Eke yewîya demokratîke bêro caardene, kurdî bênê hêzdar. Na çarçewe de ma veng danê şarê ke semedê azadîya Rayber Apoyî û statuyê şarê kurdî wa tewrê çalakîyan bibo.''