Konferansê Munîhî: Ganî heqê kurdan destûrê Sûrîyeye de bêrê cakerdene
Serekê Herêma Kurdîstanî Nêçîrvan Barzanî, Konferansê Asayîşî yê Munîhî de bi Senatorê DYA’yî Lindsey Graham, Serekkomarê Azerbaycanî Îlham Aliyev, Wezîra Ekonomî û Averşîyayîşî ya Almanya Reem Alabali Radowan reyde pêvînayîş viraşt
Almanya de Konferansê Asayîşî yê Munîhî dewam keno. Konferans de Serekê Herêma Federal a Kurdîstanî Nêçîrvan Barzanî xeylê serek û temsîlkarê welatan reyde pêvînayîş viraşt. Pêvînayîşan de tewr zaf sero heqê kurdan û cakerdişê heqanê kurdan yê bingeyînan yê destûrê Sûrîyeye de munaqeşe û qiseykerdişî ameyî kerdene.
Nêçîrvan Barzanîyî tewr verî Serekkomarê Azerbaycanî Îlham Aliyevî reyde pêvînayîş kerd û pêvînayîş de sero averberdişê têkilîyanê Azerbaycan û Herêma Federal a Kurdîstanî vindertî.
Nêçîrvan Barzanîyî Konferans de dîyologê dîplomatîkî yê bînî zî ardî ca. Bi taybetî ewro Senatorê DYA’yî yê Komarpawitî Lindsey Graham û heyetê ey reyde pêvînayîş viraşt. Ame vatene ke pêvînayîş de sero hemkarîya hempar û averşîyayîşê Kurdîstan û Îraqî qiseykerdişî ameyî kerdene.
Barzanîyî dîyar kerd ke Kurdîstan faktorê îstîqrarî yo û seba çareserkerdişê têkilîyanê Kurdîstan û Îraqî waştişî pêşkêş kerdî.
Ame dîyarkerdene ke yewna mewzûya sereke rewşa kurdanê Rojawanê Kurdîstanî bîya. Seba nê zî bi taybetî ame waştene ke heqê kurdan û pêrabesteyanê bînan yê Sûriye, destûrê Sûriye de bêrê cakerdene û pawitene.
Nêçîrvan Barzanîyî Wezîra Averşîyayîş û Ekonomî yê Almanya Reem Alabali Radowane reyde pêvînayîş kerd û her di hetan zî seba raverberdişê ekonomîya dihetî waştişê xo ardî ziwan.
Heto bîn ra Nêçîrvan Barzanî Konferans de Sereka Komîsyonê Yewîya Ewropa Ursula von der Leyene reyde zî ame têhet.
