Li çiyayên Kurdistanê Agirê Newrozê bilind bû
Gerîlayên azadiya Kurdistanê, li Herêmên Parastinê yên Medyayê Cejna Newrozê bi coşeke mezin pîroz kirin.
Bi wesîleya cejna Newrozê gerîlayên azadiyê li çiyayên Kurdistanê hatin ba hev û bi ruhekî kolektîf Newroz pîroz kirin. Di pîrozbahiyê de gerîlayan cejna hev pîroz kirin. Fermandarên HPGê Amed Melezgirt, Seyîtxan Dersim, Mahîr Serhed, Sîdar Heştenîn û Raperîn Engîzek jî beşdarî pîrozbahiyê bûn.
Di pîrozbahiyê de Fermandarê HPGê Amed Melezgirt, bal kişand ser cihê dîrokî û wateya Newrozê ya di têkoşîna azadiyê de. Melezgirt, anî ziman ku Newroz ne tenê cejne, di heman demê de sembola berxwedan û îradeya azadiyê ye.
Amed Melezgirt, her wiha şehîdên Newrozê bibîr anî û Newroz li Rêber Apo, gelê kurd û girtiyên azadiyê pîroz kir.
Piştî axaftinan gerîla û fermandar bi hev re agirê Newrozê vêxistin. Piştre gerîlayan li dora agir kilam gotin, govenda xwe gerandin û coşa Newrozê mezintir kirin.
Her wiha Koma Awazê Çiya jî tevlî pîrozbahiyê bibû û bi stranên xwe coşa Newrozê li çiyayên Kurdistanê bilind kirin.
