Li Kanada ji bo Rojava çalakiyên dest pê kirin

Êrişên çeteyên hikûmeta demkî ya Şamê yên ku dewleta tirk piştgirî dide wan, li gelek bajarên Kanadayê ji aliyê kurdistanî û dostên wan ve hatin protestokirin. Li Toronto, Montreal, Vancouver, Calgary û Ottawayê çalakiyên ku çend rojan in didomin, bi bangewaziya “Heta Rojava azad bibe, berxwedana bênavber” mezin dibin.

Li ser bangewaziya lezgîn a Navenda Civaka Kurd a Kanadayê, bi sedan Kurdistanî li Torontoyê li hev civiyan. Gel li ber avahiya navendê kom bû, bi dirûşme û stranên şoreşgerî ber bi kolana Keele-Wilson ve meşiyan. Di dema meşê de gelek caran dirûşmeya “Bijî Rojava”, “Bijî YPG/YPJ” bilind bûn, û gel bi helwesta xwe ya biryardar bala xwe kişand.

Piştî meşê, hevserokên Navenda Civaka Kurd a Kanadayê axaftin kirin û ragihandin ku wan pêvajoyeke çalakiyên bê rawestan a heft rojan destpê kiriye. Di çarçoveya çalakiyan de rêxistinên civaka sivîl a demokratîk jî bi awayekî xurt beşdar dibin, hate gotin ku dê du rojan nobeta konê bê girtin, û roja Înê jî bi otobusan ber bi Ottawayê ve bên û li ber Parlamentoyê protestoyeke mezin bê lidarxistin.

Di daxuyaniyê de wiha hat gotin: “Rojava xeta me ya sor e. Eger Rojava bikeve, Kurdistan dikeve; mirovahî dîsa bi hovîtiyê re rû bi rû dimîne. Ji vê saetê û pê ve bêdengî, bendewarî nîn e. Em ê li kolanan, di çalakiyan de, di berxwedanê de bin.”

Di çalakiyên hemdem ên li pênc bajarên mezin de, êrişên li ser gelê Rojava û Rojhilat bi tundî hatin şermezarkirin. Ji pakistaniyan jî bangewaziya “Ya Rojava azad bibe, yan jî mirovahî bikeve nav tarîtiyê, bi berxwedaneke mezin dê bersivê bide” û bang li mezinkirina têkoşînê kirin.