Mabênê Amerîka û Îranî de ‘qerqezyayîşo kontrolkerde’ dewam keno

Hewldayîşê qedînayîşê şerê DYA-Îsraîl û Îranî dewam kenê. La sey wextê şerî, wextê adirbirnayîşî yê 8ê Nîsane de zî qerqezyayîşê Hurmizî ra reyna xeberê pêrodayîşî ameyî. Îran û DYA mîyanbêranan reyde metnêko 14 madeyin ser o xebetîyenê ke çarçewaya vînayîşan kifş bikero.

Rubio: Ma ewro Îran ra verpers pawenê

Teklîf de nê çîyî estê, Îran do bi hawayo fermî vajo ke o peyê çekanê nukleeran de nîyo; tesîsê Fordow, Natanz û Îsfehanî do bêrê rîjnayene; 20 serrî uranyum nêro zengînkerdene; û bi sistkerdişê dorpêçê DYA’yî, Qerqezyayîşê Hurmizî qedeme bi qedeme biqedîyo. Wezîrê Teberî yê DYA’yî Marco Rubio vizêr va, Trump hêvî keno ke Îran ra verpers bigêro.

Îran: Ma genê binê çimî

Îranî va; ê teklîfî genê binê çimî û hema verpers nêdayo. Hetê bînî ra 'Projeyê Azadîye' yo ke seba vîyartişê gemîyan ameybî destpêkerdene, vizêr ame vindarnayene. Wina bo zî, tenge ra xeberê pêrodayîşî ameyî. No yeno şîrovekerdene ke hetî seba qebulkerdişê şertanê xo 'qerqezyayîşê kontrolkerde' xebitnenê. Trumpî va; eke kar nêşo, ê eşkenê reyna agêrê Projeyê Azadîye. Trumpî dîyar kerd ke vînayîşî baş şinê û nêzdî de verpers do bêro.

Mabênê hêzanê Îranî û keştîyanê DYA’yî de tayê pêrodayîşî bîyî. Eskeran ra dîyar kerd ke nika wezîyet aram o la eşkeno reyna pêrodayîş bibo. Artêşê DYA’yî va; înan hêrîşê di keştîyanê Îranî kerdo û keştîyî mecbur mendê agêrê. Mîrîyanê Ereban ê Yewbîyayeyan (BAE) zî va; înan di fuzeyê balîstîkî û hîrê teyareyê bêmerdimî yê Îranî vistê, hîrê kesî birîndar bîyê.

Dorpêçê DYA’yî yo sero Qerqezyayîşê Hurmizî dewam keno. DYA wazeno zirarê Îranî pîlêr bikero, la CIA raporêk amade kerdo ke Îran eşkeno tewr tay çar mengî zî xo ver bido. Reutersî zî va; tesîrê DYA’yî yê sero Tahranî sînorkerde yo.

Ambargoyê Îranî ser o 

Wezaretê Xezîneya DYA’yî va; înan 10 kes û şîrketanê Çîn û Hong Kongî rê sankcîyon şuxulnayî, çunke înan malzemeyê teyareyanê Şahedî dayê Artêşê Îranî. Na eşkerayîye, verîya zîyaretê Trumpî yê Serekê Çînî Xi Jinpingî ameye dayene.