Mesajê Newroze yê Abdullah Ocalanî: Destê ma de yo ke ma na serre bivurnê serra azadîye

Fîrazkerdişê Newroza Amedî bi tewrbîyayîşê se hezaran kesî dewam keno. Fîrazkerdiş de mesajê Rayberê Şarê Kurdî Abdullah Ocalanî ameye wendene. Kurmancîya peyame hetê Veysî Aktaşî ra ke serranê dergan Zîndanê Îmraliyî de bi Abdullah Ocalanî reyde mendo û Tirkîya ci zî hetê aktîvîsta Têgêrayîşê Cinîyan ê Azadan (TJA) Medya Aslane ra ameye wendene.

Mesajê Abdullah Ocalanî wina yo:

“Destana Newroze bi hezar serran o ke hetê şaranê Rojhelatê Mîyanênî ra sey roşanê ganîbîyayîş, xoverdayîş û wisarî yena fîrazkerdene.

Newroze ruhê xoverdayîş û ganîbîyayîşî yê şaranê ma newe ra weş kerd.

Sembol û şexsîyetê Newroze ruhê nê herêmî mojnenê. Dehaq temsîlê pergalê şaristanîya dewlete yo; marê ke milê ey ser o yê û her roje mejîyê di ciwanan wenê, wehşetê dewleta Asurî temsîl kenê, Kawayê Asinkar zî sembolê xoverdayîşê vera zulmî yo.

Şerê dînî, mezhebî û kulturî yê ke hezar serrî yo Rojhelatê Mîyanênî de dewam kenê, derba tewr pîle ya vera kulturê cuye ya hempar a mîyanê şaran de ya. Wexto ke her nasname û her bawerîye wazena biaqîyo qalikê xo mîyan û yê bînî bikera dişmen û bi nê hawayî estbîyayîşê xo bidomna, dûrîkewtişê mîyanê şaranê ma xorînêr beno. Erjê ma yê hemparî û kulturê ma yo hempar nêvînenîyê, cîyayîyê ma sey sebebê şerî vînenîyê.

Bi hawayêko rojane israrê serê domnayîşê polîtîkayanê verênan ê herême yew felaket xo reyde ardo. Parçekerdişê ke seba polîtîkayanê perçiqnayîş, înkar û dişmenîye yê ke bi taybetî Rojhelatê Mîyanênî de ameyê afernayene, çi heyfo ewro seba destwerdayîşê emperyalan sey bahane vînenîyê.

Çiqas ke şerê dînî û mezhebî yê ke hîrê seserrî welatanê Ewropa de dewam kerdî bi Peymana Westfalya ya serra 1648î ameyibê çareserkerdene zî, heta ewro dewamkerdişê nê pêkewtişan ê Rojhelatê Mîyanênî de seba şaranê ma bîyo sebebê trajedîyanê xorîyan. La, ewro fersendê ma esto ke kultur û bawerîyî reyna eşkerê pîya biciwîyê. Destê ma de yo ke ma dormeyê şer û kaosî yo ke Rojhelatê Mîyanênî de yeno afernayene, seba heme şaran bixelisnê baxçeyê azadîye. Ma eşkenê trajedîyê ke ma ser o yenê ferzkerdene apey bîyarê û seba şaran dormeyê azadîye biafernê.

Nika, rîpelê nimitî yê tarîxî vejîyenê werte, îhtîmalê aştîya mîyanê şaran û awankerdişê neteweya demokratîke zêdêr beno. Wexto ke edetê dewlete yê Sunî û Şîe û edetê neteweperestîye yenê derbaskerdene, fersendê cuya azade ya mîyanê şaran xurt beno. Ewro yew rîpelo newe abîyo. Raye seba şaranê na herême abîya ke pîya bi hawayêko azad biciwîyê.

Pêvajoya ke ma 27ê Sibata 2025î de daye destpêkerdene, armanc kena ke bingeyê yewîye goreyê ruhê Newroze newe ra weş bikera.

Seba nê, ganî ma bawer bikerê ke kultur û bawerîyî eşkenê pîya biciwîyê, ma eşkenê îdeolojîyanê tengan ê neteweperestan ra derbas bibê û serê bingeyê entegrasyonê demokratîkî de bibê yew û pîya estbîyayîşê xo awan bikerê. Ganî ma o hişmendî bivejê werte ke ma eşkenê sey tarîxê ma de çawa bîyo ewro zî vera her tewir şer, xizanî û wehşetî de ser bikewê.

Newroza 2026î bi heme weşîya xo modernkerdişê nê tarîxî ya. Tarîx nika vejîyeno werte, reseno fersendêko pîl seba hişmendîya serê bingeyê nasnameyê kulturî yo raşt. Mana û hêzê Newroze sey ‘nika’ vejîyeno dika tarîxî ser. Newrozê emserrî û yê serranê ameyoxan wayîrê girîngîyêda tarîxî ya winayî yê.

Newroza 2026î riçikê xo ra newe ra weş bena, dema nika de bi gamêda pîle ver bi demokratîkbîyayîş û entegrasyonê demokratîkî ve bena newe; rengê Newroze gêna.

Roşanê Newroze, sey tarîxî de, newe ra weş beno, tesîrê xo zerrîya Rojhelatê Mîyanênî de tesdîq keno û reyna sey sembolê yewbîyayîşê demokratîkî seranserê herême de rolê xo kay keno. Newebîyayîşêko girîng qewimîyeno û o do dewam bikero.

Newroz heta nika bi erjanê sembolîkan ameyêne fîrazkerdene. Nika, Newroze ne hewnêk ne zî utopyayêk temsîl kena, a yew cuya komelkîya pêkameye û averşîyaye temsîl kena. Newroze a roja ke ma xo hem cîhetê mana ra hem zî cîhetê fîzîkî ra şinasnenê ya.

Ma xo Newroze de heme têkilî û manayanê nêbesan ê ke tim ma aciz kenê pak bikerê û ma weşîye bi tewirê têkilîyêka zane, bi xorîtîya mana, bi exlaqêko newe yê azadîye û bi resyayîşêko estetik o newe hembêz bikerê.

Ma felsefeya ‘Jin, Jiyan, Azadî - Cinî, Cuye, Azadî’ heme têkilîyanê xo de bivisnê pratîk û yew weşîyêka azade bi dest bivisnê. Ma fam bikerê ke Newroze ne hêvî, hewn an zî teorî ya, a satê pratîkkerdişî ya. Bêrê ma bi yew hişmendîya zane û xorîtîyêka temame ya mana verpers bidê na satê pratîkkerdişî.

Bi wesîleya Roşanê Newroze, destê ma de yo ke ma emserre seba heme şaranê Rojhelatê Mîyanênî bixelisnê yew serra azadîya raşte û edetê dostîye û paştgirîye mîyanê şaran de awan bikerê. Ma eşkenê bi peynîardişê perçekerdişanê etnik û dînî-mezhebîyan û pêkewtişanê birakiştişî û bi garantîkerdişê yewîya heme kultur û bawerîyanê dînîyan serê bingeyê azadî û wayûbirayîye nê pêk bîyarê.

Vera rijnayîşê pîlî yê komelkî û ekolojîkî yo ke hetê modernîteya kapîtalîste ra ameyo afernayene, ma girêdayeyê ruhê azadîya Newroze çareserîyêka modernîteya demokratîke serê bingeyê sîyasetê demokratîkî, prensîbanê ekolojîkan û azadîya cinîyan aver berde.

Ma raye nedê ke Rojhelatê Mîyanênî yo ke kultur aferneno, hetê hêzanê hegemonîkan ra bibo warê şerî. Sey tarîxî de senî bîyo, ma eşkenê ewro zî pîya astenganê verê nê kulturê pîlî ke bikero xo bi hawayêko azad îfade bikero û serê bingeyê nasnameyanê xo yê raştan entegre bibo, derbas bikerê. Wexto ke ma nêweşîyanê neteweperestî û mezhebdarîye peyê xo de veradenê û kulturê tarîxî yê paştgirîye yê hezar serran mîyanê şaranê xo de xurt kenê, qet yew asteng nêmaneno ke ma nêeşkenê derbas bikerê.

Mumkun o ke merdim bi ruhê yewîye sîyasetê demokratîkî dîyar bikero. Eke ma biwazê têkoşînê hezar serran ê binêdestan tacîdar bikerê, cayê ney Rojhelat de zî Rojawan de zî mîyanê dormeyê kulturî yê kapîtalîstî de nîyo, cayê ci dormeyê azadî yê Rojhelatê Mîyanênî yo. Ma eşkenê entegrasyonê demokratîkî nê axan ser o serê bingeyê yew pêvînayîşê raşt û merdimatî, yewî, paştgirî û dostîyêda newîye newe bikerê.

Ez Roşanê Remezanî yê şarê ma fîraz kena û hêvî kena ke ruhê roşanî aştî û yewîye geş bikero.

Newroza 2026î reya verên a ke hetê şaranê ma ra bi ruhê entegrasyonê demokratîkî, aştî û yewîye yena fîrazkerdene. Ez bi heme hêzê xo piştgirîye dano nê ruh û îradeyî û hêvî keno ke Newroza emserrî ya ke bi raştî zî heq kena ke sey ‘Roja Newîye’ bêra fîrazkerdene, serranê ameyoxan de biba wesîleya meşêko biheybetî; ez seba heme şaranê ma aştîye wazena. Ez şima heme bi heskerdiş selam kena.

Abdullah Ocalan

Girawa Îmraliyî”