Newala Havaçorî de nobeta xoza û cuye ameye destpêkerdene
Newala Havaçorî ya Dêrsimî de nobeta xoza û cuye ameye destpêkerdene. Çalakwanan vat waştişê înan qedexe nîyo, pawitişê xoza yo.
Dewa Havaçorî ya qezaya Pulurî ya Dêrsimî de vizêr serkêşîya Komala Dewa Havaçorî de nobeta xoza û cuye ya yew aşme ameye destpêkerdene. Nobeta ke Newala Havaçorî de ameye destpêkerdene de pankartê sey ‘’Ma seba xoza nobete tepişenê, seba ameyoxî payra yê’’ û ‘’ Xoza ameyox a, seba pereyî ameyoxê xo nêroşe’’ ameyî akerdene.
Çileme Hayrogluya ke bi nameyê komele qisey kerd, vat bitaybetî 10 serranê peyênan de nebatê sey ribêse, yeling,sung, ûnixî seba qezenckerdişê pereyi zaf yenê arêdayene û no zî zirar dano ekosîstemî. Haroglu vat waştişê înan qedexekerdiş nîyo, ê wazenê warê cuye yê nebatan bipawê.
Eşkerayîye de bale ameye antene zengînîya bîyolojîkî ya coğrafyaya Newala Munzurî ser û ame vengdayene ke wa vera falîyatanê maden, enerjî û talanê tîcarî warê cuye bêrê pawitene. Ame vatene ke nobete eynî wextî de paştî dana nobetanê dormeyî ke qezayanê bînan ê Dêrsimî ke yenê rayraberdene ya zî do bêro destpêkerdene.
