Rejîmê Îranî di reyî hêrişê Başûrê Kurdîstanî kerd
Rejîmê Îranî saetanê şewe de bi dron û muşekan hêrişê sînoranê Hewlêr û Balekayetî yê Başûrê Kurdîstanî kerd. Dima ra herême de adir vejîya û derheqê zîyananê madî û ganîyan de hema qet malumat nêdîyayo zanayene.
Ame ragihandiş ke Îranî vizêr şewe erey bi di dronan baregehê Hîzbê Demokratî yê sînorê Dêgele yo ke wîlayetê Hewlêrî ra girêdayeyo, dayo bombayan ver. Hema derheqê zîyananê hêrişî de qet malumat nêameyo vila kerdene.
Çimeyêko taybet Rojnewsî rê dîya zanayene ke saetanê ereyan ê şewa vîyarte de, rejîmê Îranî di reyî hêrişê Başûrê Kurdîstanî kerd. Goreyê malumatan, hêrişo verên bi teyareyêkê bêmerdimî baregehê Hîzbê Demokratî yê sînorê Dêgele yo ke bi wîlayetê Hewlêrî ra girêdayeyo de ame kerdene.
Hêrişo dîyin zî bi muşekan şaristanokê Çomanî yê sînorê Balekayetî de pê ame. Heta nika derheqê zîyananê madî û canîyan de qet malumat nêameyo vila kerdene. La hêrişî ra dima herême de adir vejîya. Dima ra tîmanê adirweşnayoxan şewat girewt binê kontrolî.
Hêjayê vatene yo ke agirbest û pêkerdişê mabênê Amerîka û Îranî est bo zî, hêrişê rejîmê Îranî yê vera tayê welatanê Kendavî û Başûrê Kurdîstanî dewam kenê.
