Rita: Ez wazena biba sefîra modelê cuya newîye yê Rojawanî

Rita ke beşdara çalakîya "Karawanê Dayîkan" a Almanya ya, ANF'yî rê cuya xo ya ke Şorişê Rojawanî reyde resaye pê, amancê karawanî û pirdê xo yê şarê kurdî reyde vat.

Rita vat ke a Neumünsterî ra ya û endama Înîsîyatîfê Keyeyan seba Haştîye ya; vat ke verê zaf rey şîyêne Sûrîye çunke mêrdeyê aye kurdêko sûrîyeyij o. La vat ke nasbîyayîşê aye bi Rojawan, sîyaset û felsefeya uca zaf dima, bi saya lajê aye bîyo: "Lajê mi kewtbî safanê enternasyonalîstan û rojêk mi ra va, 'Dayê, ez şina Rojawan.'" Vat ke 2000'an ra nat na felsefe ra ewnîyeno, û hema zî zaf bi qîmet û raşt vîneno.

Rita vat ke fikrê karawanî embazanê cinî yê bînan ra vejîya; vat ke rayîrşîyayîşê enternasyonalîstan o derg ke ciwanan peynîya aşma çeleyî ver bi Kobanê viraşt, îlham da înan. Vat: "Seba ke ma vengê xo bidê eşnawitene karawan rayîrêko zaf baş o. Nê cayî de xoverdayîş, rêxistinîye û têkoşînê Dayîkanê Haştîye yê Tirkîya û Kurdîstanî ma rê bî nimûne. Ma zî vat 'Çira eynî çî ma Almanya de nêkerê?' û Karawanê Dayîkan ard meydan."

Rita vat ke no sefer seba aye maneyê bextewarî û coşî yo, û bi taybetî têkilîya bi cinîyanê kurdan tim germ û samîmî ya; vat ke no têhetbîyayîş bawerîya aye ya ke eşkena çîyêk bivurno, xurt keno.

Rîta vat: "Beno ke vatişêko îddîayin bibo, la ez wazena biba sefîra nê modelê cuya hempare ya newîye ke nê welatî de wazîyeno bêro afirnayene."

Çime: ANF