Şaredarîya Kuşadasiyî rê operasyonê “ruşwetî”

Adresa newîye ya operasyonanê vera şaredarîyanê CHP’yî bîye qezaya Kuşadasıiyî ya Aydinî. Serekê Şaredarîya Kuşadasiyî Omer Gunel, çarçeweya tehqîqatêkê Serdozgerîya Komare ya Stenbolî de saetanê serê sibayî de ame destbendkerdene. Eşkerayîya Serdozgerîye de ame vatene ke Gunel zî tede 6 kesî bi sûcdarîya “ruşwetî” û “îrtîkapî” ameyê tepiştene.

Serdozgerîya Stenbolî wina eşkerayîyêk daye:

“Çarçeweya dosya bi numreya 2025/186146î de ke hetê Serdozgerîya Komare ya Stenbolî ra yena rayraberdene; sûcanê "Ruşwet" û "Îrtîkap"î yê ke girêdayeyê Şaredarîya Kuşadasiyî yê rê, beyanê şahîd û muştekîyan, îfadeyê şikdaran, belgeyê dosya, qeydê HTS’yî û raporê MASAK’î pîya ameyî ercnayene. Netîce de gumanê meqûlî peyda bîyî ke nê sûcî ameyê kerdene. Serekê Şaredarîye Omer Gunel, Mudirê Îmarî Ahmet Taşkan û Mudirê Kontrolê Awanîyan M. Burak Gundeş zî tede heqê 6 şikdaran de 13.03.2026 de Aydin, Îzmîr û Antalya de operasyonêko hemwext ame kerdene. Şikdarî ameyî destbendkerdene û cigêrayîş ame kerdene. Seba ke raştîya madîye eşkera biba xebatî bi dîqet yenê rayraberdene.”

Kamî ameyê destbendkerdene?

Goreyê eşkerayîye kesê ke ameyê tepiştene wina yê: Omer Gunel (Serekê Şaredarîye), Ahmet Taşkan (Mudirê Îmarî), M. Burak Gundeş (Mudirê Kontrolê Awanîyan), Meral Celep (Mîmara Şaredarîye), Ferdî Zengînoglu (Karsaz), Huseyin Kabasakal (Karsaz).

Nêrazbîyayîşê wekîlê CHP’î

Wekîlê CHP’yî Bulent Tezcanî tepiştiyayîşê Gunelî rê nêrazîbîyayîşê xo mojna. Tezcanî medyaya komelkîye ra wina vat: “Kumpasan rê yewê bîn bî zêde. Serekê ma Omer Gunel sibayî ame destbendkerdene. Êyê ke sindoqan de nêeşkenê ma bîyarê war, bi dosyayanê kumpasî wazenê îradeyê şarî bêveng bikerê. Îradeyê Kuşadasiyî nêeşkeno bêro tepiştene. Serekê ma ganî lezabezî bêro veradayene.”