Zubeyir Aydar: Heme aktorê kurdan ganî stratejîyêka hempare ser o bêrê têhet

Endamê Konseya Rayraberdişî ya KCKyî Zubeyir Aydarî derheqê Kombîyayîşê Pêroyî yê 24. ê KNKyî de ke 6-7ê hezîrane Holanda de bajarê Venloyî de virazîya, nirxnayîşî kerdî û vat ke beşdarîyêka pîle heme parçeyanê Kurdîstanî ra û Amerîka, Kanada û Avusturya ra virazîya. Aydarî vat ke endamê ke nêeşkaybî bêrê zî Silêmanî, Moskova û Qamişloyî ra bi hewayêko hemdem beşdar bîyî, û kombîyayîş demêko zaf krîtîk de bi beşdarîyêka zafe virazîya.

Aydarî bale ante ke Rojhelatê Mîyanênî de Şerêkê Dinya yo Hîrêyin est o ke Kurdîstanî zî raşterast gêno binê tesîrê xo: "Herêma ma de qederê Kurdîstanî nê deman de eşkeno newe ra bêro nuştene. Kurdîstanî ser o prosesêko zaf giran yeno ramitene û bazarîyê neweyî yenê kerdene. Bi na mana ma temamî merkezê şerêk de yê."

Aydarî vat ke Kombîyayîşê Pêroyî de averşîyayîşê heme parçeyanê Kurdîstanî bi teferûat ameyî analîzkerdene û her parçe prosesanê krîtîkan ra ravêreno: "Kombîyayîşê ma de mesajê Birêz Ocalanî, Birêz Karayilan û Cemil Bayikî ameyî wendene. Nika Vakurî de prosesêko newe û cigêrayîşê dîyalogî est o; ganî ma teqez naye bieşkê. Çareserîya meseleya kurdan a Vakurî, hêzê xo est o ke heme Kurdîstanî û çar parçeyan ser o raşterast tesîr bikero. Rojawan de hêriş, şer û muzakereyê entegrasyonê dezgehkî dewam kenê. Başûr de zî seba ke di serrî yo hukmat nêameyo awankerdene prosesê hîna krîtîkî ma pawenê. Hetê Rojhelatî zî netîceyê şerê mîyanê Îran, Îsraîl û Amerîka, û kurdan ser o tesîrê nê netîceyan, ma eleqedar kenê."

Aydarî bale ante ke vera nê têkilkerdişê girdî ganî dinyaya fikrî, akademî, sîyasetkar û heme serekê partîyanê kurdan pîya vindê, û tepşêko parçekerde nêyeno qebulkerdene. Bi atfkerdişê meseleya kurdan veng da yewîya neteweyî: "Heme aktorê kurdan mecbûr ê ke pîya bê, feydeyanê hemparan ser o pê bikerê û stratejîyêka hempare awan bikerê. Prosesanê vurîyayîşî de ma nêeşkenê cîya bivindê. Hêvî û hedefê ma o yo ke no serre de ma Konferansê Neteweyî arê bidê û stratejîya hempare dîyar bikerê. Eke ma têhet nêbê, seke vatişanê kurdan de yeno vatene: 'Em nebin yek, em ê biçin yek bi yek.'"

Aydarî vat ke Kombîyayîşê Pêroyî de qerarêko tarîxî ame girewtene: "Kurdî ewro şarêko gird ê ke nizdîyê 60 mîlyon nifûsê xo est ê, la  çi heyf ke dezgehan de ke dinya îdare kenê, temsîlêko fermî çin o. Seba ke ma na kêmasîya xo ya girde wedarnê, do derheqê statu û temsîlê şarê kurd ê warê mîyanneteweyî de muracatêko fermî Komela Miletanê Yewbîyayeyan (BM) rê bêro kerdene. KNK do bibo pêşengê na xebata dîplomatîke." Aydarî vat ke bi taybetî derheqê ziwan û perwerde bi ziwanê dayîke de zî kombîyayîşî de munaqeşeyê cîdî ameyî ramitene û netîceyê muhîmî ameyî vetene. Vat ke do heme enerjî û giranîya na serre bidê serkewtişê Konferansê Neteweyî.