Dewleta Tirk ji ber sûcên şer tê darizandin
Dadgehê li L'Université Libre de Bruxelles (Zanîngeha Azad a Brukselê - ULB) destpê kir û ji welatên cuda hiqûqnas, aktîvîstên mafên mirovan, mexdûrên êrîşan û şahid tev li bûn.
•
1 deqe xwendin
Dadgehê li L'Université Libre de Bruxelles (Zanîngeha Azad a Brukselê - ULB) destpê kir û ji welatên cuda hiqûqnas, aktîvîstên mafên mirovan, mexdûrên êrîşan û şahid tev li bûn. Ji bo parastina xwe bike bang li Dewleta Tirk hate kirin, lê li gel vê yekê jî nûnerê Dewleta Tirk tev li nebû. Darizandin bi rengekî xiyabî tê kirin.
Axaftina destpêkê ya dadgehê ji aliyê Biacinto Bisogni ve hat kirin. Biacinto Bisogni got, "Ji bo vê dadgeha girîng em li hev kom bûn û darizandin wê du rojan dewam bike. Bi piştgiriya Zanîngeha Azad a Brukselê em vê dadgehê pêk tînin. Ji bo parastina mafên mirovan û parastina Rojava em li vê derê ne. Rojava ew cih e ku azadiya jinan û demokrasî lê tê avakirin; ji ber vê yekê jî divê bê parastin. Hûn hebûn bi xêr hatine."
Li dadgehê wê sûcên kuştina sivîlan, rojnamegeran û siyasetmedaran, êrîşa li ser binesaziyê, îşkence, kiryarên li derveyî mirovahiyê û bikaranîna çekên qedexekirî bêne nirxandin.
Bernameya roja destpêkê
* 09:00 - 09:30: Qeyd û pêşrûniştin
* 09:30 - 09:45: Danasîna endamên dadgehê
* 09:45 - 10:15: Axaftina destpêkê ya dozgeriyê
* 10:15 - 12:30: Rûniştina 1emîn
* 13:30 - 15:00: Rûniştina 2yemîn
* 15:15 - 17:50: Rûniştain 3yemîn
Dadgeh ji aliyê Komîteya Têkiliyên Derve ya Rêveberiya Xweser a Bakur û Rojhilatê Sûriyeyê, koma parêzeran a ku sûcên Dewleta Tirk dişopîne, Navenda Parastin û Lêkolînê ya Mafên Jinan û rêxistinên cuda yên mafên mirovan ve tê lidarxistin.
ULB, MAF-DAD (Komeleya Hiqûqê ya Navneteweyî û Demokrasiyê), ELDH (Komeleya Hiqûqnasan a Demokratîk a Ewropayê), IADL (Komeleya Hiqûqnasan a Demokratîk a Navneteweyî), Kongreya Neteweyî ya Kurdistanê (KNK) û Enstîtuya Kurd a Brukselê jî piştgiriya çalakiyê dikin.
