KNK’yî nameyêka akerde dewletanê NATO’yî rê erşawit

Konseya Rayberdişî ya Kongreya Neteweyî ya Kurdîstanî (KNK) verê kombîyayîşê serekanê NATO’yî ke aşma temmuze de Anqara de bêro viraştiş nameyêka akerde erşawite û KNK’yî seba aştîyêka adil û domdare taybetî çar waştişî dewletanê endamê NATO’yî ra kerdî.

Mektuba KNK’yî bi nê qaydeyî yo:

“Ma serê nameyê Kongreya Neteweyî ya Kurdîstanî (KNK) verê zîrweyê NATO’yî ya ameyoxe ya Anqara de nusnenê, seba ke ma bala şima biancê serê prosesê dîyalogî yo ke mabênê Abdullah Ocalan, Têgêrayîşê kurdî û dewleta Tirkîya de dewam keno ke amancê ci resayîşê aştîyêka adîlane û mende ya. Sey yew endamê stratejîk ê muhîm ê NATO’yî, averşîyayîşê Tirkîya de benê wayîrê netîceyê winasî yê ke sînoranê aye ra zaf wetêr ê.

Çareserîyêka demokratîke ya meselaya kurdî Tirkîya de aramîye bihêz kena û seba asayîşê temamê herême bena hetkar. Demêko ke Sûrîye, Iraq û Îran pêro pê nezelalîyêka kûre û pêkewtişan rê rî bi rî yê, prosesê dîyalogî yo Tirkîya de îmkanêko nadîr nîşan dano. Eke rayîr bêro dayene ke bi şeklêko manadar aver şêro, ey eşkenê bibê hetkar seba Tirkîyaya aram û demokratîke û hetkarî bide kêmkerdişê tengezarî û pêroyî herêmî, taybetî derheqê Rojava de Sûrîya de û Herêma Kurdîstanî ya Îraqî de. Meseleya kurdî de çareserî nêvrazîyo zaf zehmetîyê sîyasî û asayîşî herême ser de tesîr kenê. Hetê kurdî qerardarîya xo ya seba çareserîyêka sîyasî nîşan daya.

Hetê kurdan zaf ray qerardarîya xo ya seba çareserîyêka sîyasî û qiseykerdişî nîşan daya

Vengdayîşê Abdullah Ocalanî ya 27ê sibata 2025î seba Partîya Karkerê Kurdîstanî (PKK) ke çekê xo rono û xo fes bikero, derfetêko tarîxî seba aştîye akerd û dima ra game şênberî ameyî eştene, mîyanê înan de adirbestêko yewhet û qerarê peynîardişê têkoşînê çekdarî est ê. Birêz Ocalan ke hetê bi mîlyonan kurdan ra sey temsîlkarê înan ê meşru yeno qebulkerdiş û muzekkereyanê aştîye yê 2013-2015î de rolêko merkezî kaykerdo, seba aştîyêka bi rûmet û bi tesîr sey qisey kerdoxêke sereke maneno. La seba ke qiseykerdişî serkewte bibê, ganî hetê kurdî zî bieşko binê şertanê adîlan de beşdar bibo. Domnayîşê astengkerdişê resayîşê Birêz Ocalanî û tecrîdê ey, bi prosesê aştîya pêbawer ra nêeşkeno yew ca de bê. Aştîyêka adîlane û domdare Tirkîya de ne tena do welat hetê zereyî ra bihêz bikero, sewbîna do menfîetanê asayîşî yê hîrayî yê dewletanê bînan ê endamanê NATO’yî de zî bibe. O do rîskê pêkewtişê neweyî û koçberbîyayîşî kêmî bikero, tedayê têgêrayîşê penaberan ver bi Ewropa kêm bikero û do hetkarî bide seba vindarnayîşê radîkalîzasyona hîrayê ke seba şer û bêîstîqrarî dewam kenê teberê herême de virazîyena.

Çar waştişî

Naye ra, ma vengdayîşê welatanê endamanê NATOyî kenê, wexto ke ê xo seba zîrweyê Anqara amade kenê ke paştî bidê şertanê laziman seba prosesê aştîye yo cîdî û serkewte. Bitaybetî, vengdayîşê serekanê welatanê endamê NATO’yî kenê ke piştgirî bidê:

*Çimdarî û domnayîşê prosesê dîyalogî yo mabênê dewleta Tirkîya û Têgegrayîşê Kurdî de.

*Peynîardişê îzolasyonê serê Abdullah Ocalanî û ronayîşê şertanê qanûnîyan ke rayîr bidê ey bi şiklêko azad û bi tesîr dîyalogê rayedarên Tirkîya de beşdar bibe.

*Çarçewaya demokratîke û qanûnîye seba naskerdişê heqanê bingeyînan ê kolektîfî yê şarê Kurdî Tirkîya de.

* Nêzdîbîyayişê sîyasî ke aştîye û demokrasîya Tirkîya de sey pîyakar seba haştîye û aramîya herêmî ya hîrayêr fehm keno. Aştîyêka adilane û mende mabênê dewleta Tirkîya û şarê kurdî de do Tirkîya bihêz bikero, rîskanê koçbebîyayîşî yê demdergan ê hempeymanê. Ma seba bal û erjnayîşê şima nika ra sipas kenê.