‘Ma nê prosesî seba AKPyî ney, seba ke ma bawer kenê ke raşt o dewam kenê’

Endamê Akademîya Zanistê Komelkî ya Abdullah Ocalanî Duran Kalkanî roportajê xo yê televîzyonê Medya Haberî de rojdem erjna.

Kalkanî vat ke her çiqas ke rantçî zî bibê, do peyser nêrê PKKyê verênî û vat: "Ma sermuzakerekar sey Rayber Apoyî dîyar kerd. Mîyanê 14-15 aşmanê vîyarteyan de ma tim tepşê xo zelal nîşan da: ma vat azadîya fîzîkî ya Rayber Apoyî, mifteyê her çîyan no yo. Eke qanûn çîyêko wina bigîro xo mîyan, weş o; la eke nêgîro, na xeta ma ya sûr a, qerarê Kongreya ma ya 12. zî bî. Têgêrayîş û şar do naye pozîtîf nêvînê."

Kalkanî ard ziwan  ke eşkerayîya peyêne ya MGKyî (18ê hezîrane) nêzdîbîyayîşê AKP û dewleta tirke mojnena û vat: "Prosesî hema sey teror gênê dest, çarçeweya têkoşînê vera terorî de gênê xo dest. Tu çîyêko newe çin o. Hema 'PKK rêxistina terore' vanê. Wina aseno ke MGK wazeno PKK dewam bikero. La PKK fes bi; ma vurîyayî, do peyser nêro. Ma nê prosesî seba dewlete ney, seba AKPyî ney, çunke ma bawer kenê ke raşt o, dewam kenê."

Kalkanî bale ante ke dewleta tirke bi metodanê şerê taybetî Kurdîstan de teror keno û vat: "Gerîla çekê xo veşnayî, tena seba asayîşê xo bi tifingêk vindeno. La înan xeylê însanî çekdar kerdî, eştî serê komelî. Tayfaya qorîcîyan est a; însanan nêverdanê warî, dewanê înan vêşnenê, keyeyanê înan rîjnenê, heywananê înan kişenê. 16 aşmî yo gerîlla ra çi vejîya? Çîyêk. La qorîcîyan çi nêkerd?"

Kalkanî derheqê şerê ABD-Îsraîl-Îranî de vat ke no şer şerê şarê Îranî ney, şerê sîstemê modernîteya kapîtalîst o û feydeyanê zereyî ra peyda bî, û resa kîlîtbîyayîşê tîcaretê Tengawa Hurmuzî. Vat ke ganî Îran nê weqayan ra ders bivejo, îdaman bivindarno û bibo demokratîk.

Kalkanî derheqê weqaya Şemzînan a çawişê pisporî de vat: "O xo zî kişeno, domananê xo zî cinet vîyarnayo." Bale ante ke seke weqaya Gulistane Doku û Rojine Kabaiş de bî, nê hêrişî zî hetê çeteyanê şerê taybetî ra ke dewlete rêxistine kerdî, yenê kerdene.

Kalkanî venga ciwanîya kurd û cepheya sîyasetê demokratîkî da ke berpirsîyarîya xo biyarê ca û Têgêrayîşê Komûnanê Demokratîkan aver berê: "Demokratik sîyaset sîyaseto komelgir o, sîyasetê dewletgir ney. Ganî ciwanî komel mîyan de bibê, rêxistinkerde bibê, vera her tewir şerê taybetî têkoşîn bikerê. Rastê şerê taybetî ameyîş qeder nîyo."

Kalkanî derheqê fedayîye de vat: "Hezîrane aşma fedayîyan ya. Fedayîye tena şerî de nêbena; fedayîye manaya beşdarbîyayîşê cuya azade û komûnal a bi cesaret û fedakarîyêka girde dana. 30 serrî yo ma na xete de, xeta azadîya cinî, pêşengîya cinîyan, xo perwerde kerd. Ez bi rêze û minet serrgêra 30. ya şehadetê hemraye Zîlane û serrgêra 7. ya şehadetê hemra Helmetî yad kena."