Komên girêdayî HTŞê li Şêxmeqsûdê bi zora mal şelandin

Komên girêdayî HTŞê bi darê zorê li taxa Şêxmeqsûdê ya bajarê Helebê diziya malan dikin. Şêniyên taxê agahî dan ANHAyê û diyar kirin ku komên çekdar ên HTŞê bi zorê diziyê dikin. Li gorî agahiyan, çekdarên tê texmînkirin girêdayî komên hikumeta demkî ya Sûriyeyê ne bi ser maleke Kurd ê ji 5 kesan pêk tê de girt, di bin gefa çekê de tiştên malê li pêş çavê xwediyê wê weke telefon, 250 hezar lîreya Sûriyeyê dizîn.

Berê jî dizîn, talankirin û şêlandina sîstematîk li dijî malbatên Kurd ên li taxên Şêxmeqsûd û Eşrefiyê pêk hatibûn. Ev yek bi armanca koçberkirina Kurdan û hiştina malên xwe nîşan dide. Ev sûc piştî êrişa dijwar ên li dijî her du taxan di 6ˊê Çileya borî de, pêkanîna komkujî û wêrankirina mal-milkan û binesaziyan pêk tê.